之前巴洛迪利俾人掟蕉，都可以好冷靜去面對，我求大俠仲以為佢返咗意大利踢波後洗心革面，但本性難移；喺上周五意大利作客捷克嘅世盃外圍賽，巴神好似食咗火藥咁，4分鐘內連拎兩張黃牌被逐，之後對球員通道嘅布幕拳打腳踢，再喺twitter同球迷爆發罵戰！
場波踢到68分鐘都係0:0，可能巴神有啲心急，對手傳咗個波後佢先鏟埋去，拎咗第一張黃牌。72分鐘，巴神想接應高波，同對手爭頂中有啲推撞，結果拎多張黃牌被逐。巴神明顯覺得今次犯規未至於嚴重到攞牌，所以見到球證拎牌嗰陣都好錯愕。佢只好又嬲又無奈咁行出場，見到教練柏蘭迪利時，佢攤開雙手表達不滿，柏帥循例拍拍佢膊頭。
成肚火嘅巴神行到球員通道終於要爆發！佢一拳打落布幕度，再一腳伸埋去。可能佢以為忍到去球員通道就ok，但電視台嘅攝影機拍低晒一切。完場後，佢怒氣沖沖咁同記者講：「係唔係紅牌？你哋返去睇完重播再同我講！」
寸球迷咪捧意大利
巴神領紅，意大利最後攻唔入捷克，賽和0:0。唔少球迷賽後走去巴神twitter度寸吓佢，再次撩起佢把火，佢話：「你哋鍾意寫咩就寫咩，去到洲際盃你哋可以捧第二個國家，我係真心同你哋講㗎！仲有，唔該你哋翻睇場波，仔細咁睇，要睇晒全場！」不過他在上周六於twitter道歉。
講到巴神又闖禍，最無奈都係柏蘭迪利，佢就咁話：「巴洛迪利需要學識點去處理呢啲情況，佢仲要成長！我本來諗住換佢走㗎嘞，但都係遲咗步。」隊長保方就撐巴神，覺得球證過嚴，「佢太唔好運，呢啲碰撞好正常，被罰第2張黃牌實在太嚴。」今場和波，意大利6戰14分排榜首，仍領先第2保加利亞4分。
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate