彷彿全城的焦點和疑惑，都落在化骨龍如何中途轉肌，進化成鋼條筋肉男上，張家輝這幀屈肌照的確屈機。不過，圈中靠屈肌屈機的又豈止飛機（家輝在《黑社會》的渾號）？最經典非喬宏莫屬，49吋胸肌厚過部電單車；「力王」樊少皇未見其人先見其胸；就算是杜汶澤的肥腩仔，起碼夠膽端上枱饗觀眾眼球，我認為都好屈。
撰文：蘇芬妮
【台灣嚇肌】
吳建豪 鬥雞死光
江蘇衛視《星跳水立方》根本為他而設，（女）觀眾黐實電視機，與八嚿腹肌和雞排胸建立更緊密關係。只可惜無論你在哪個角度欣賞，吳建豪的兩點都是鬥雞的。
吳克羣 麒麟臂彎
吳克羣出晒名堅大隻，只有他的強壯臂彎才夠力俘虜何家超蓮，兼對他千依百順。不過，近日兩口子疑情海翻波，吳竟背女友偷嗒台灣混血索模Rima。還看他的麒麟臂怎樣拆招了。
周杰倫 人魚乍現
別以為周杰倫只懂Yo女、check妹，認真起來也有點料到。就如他最近拍攝新片《天台》，就操出八塊腹肌及「不能說笑的咪咪」，乍看還見到人魚線呢！
【土製戰肌】
羅仲謙 胸墊護身
你估TVB真係睇中羅仲謙演技咩？其實咪同楊怡一樣，都係贒中42吋胸肌夠厚可做墊咋。問題係羅仲謙咁大隻，好容易招惹埋劉定成，陣間影咗猛男寫真就唔好囉。
林德信 瑜伽催谷
做男人最緊要有膊頭，但冇肌肉就冇乜看頭。林德信有冇膊頭就唔知，但肌肉方面就一定有，原來練瑜伽都可以咁大隻，名副其實剛柔並重。
蔡一傑 忽然惰肌
張家輝咁肌，蔡一傑都唔執輸，拿拿臨摷番一大堆舊照在微博騷堅肌。不過去年草蜢crossover軟硬開騷，估唔到俾肥底嘅葛民輝跑出，蔡一傑睇嚟都要再操弗啲啦。
【古巨肌】
樊少皇 力王穿牆
看過樊少皇的健碩身軀，你有理由相信一拳打爆牆、一拳打出腸，並非《力王》的特技效果。陳惠敏曾說，樊少皇是他見過這麼多藝人之中，最堅揪的一位。
喬宏 雄獅屹立
「東亞病夫」這四個字，應該最先由喬宏叔剝下來。當年華人大多數營養不良，偏偏這「影壇雄獅」擁有49吋胸肌，粗獷造型深入民心，最重要是他有錢、高大兼靚仔，屈到爆。
徐錦江 金漆不倒
你知我知，徐錦江全身最強勁的肌肉來自下半身，有名你叫「金槍不倒」啦！不過也不要小看他的上半身，當年拍攝《形神集》時，用金色漆油噴全身，肌肉有如魚鱗般一格格。
【搞乜肌】
杜汶澤 巨腩唧胸
杜汶澤不嬲都是演技派，絕對唔會賣弄身形，不過當年拍攝《人間喜劇》，都算為藝術界犧牲過。只見他打出個肥肚腩，雙手唧胸來招「藉着兩點說愛你」，真係多謝夾盛惠咯。
變態超人 笠凸戰機
邊個話超人一定要高大靚仔？這些只是升斗市民一廂情願的睇法。變態超人都一樣好肌，只不過他將女人底褲笠頭、腳穿魚網絲襪、再笠條拉長型底底喺身之嘛。
【西方戰肌】
碧咸 型底轉場
萬人迷碧咸掛靴了，大家雖然再看不到他的獨門「七旋斬」，但女士們可放心，今後仍可看到他的完美胸肌，直至他宣佈唔拍H&M內褲廣告一刻為止。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！