上周三《蘋果》財經投資版一則題為「一個月贏一千萬」的專欄，吸引眾多目光，收視高回響大。簡單講，就係倪震向周顯爆料，話自己喺1.2至1.3元買入400萬元恒力商業地產（169），直至5月底以五個幾沽出，勁賺1,000萬，時間只是短短個半月。
個半月贏1,000萬，表面上羨煞旁人，但瞬即被網友質疑，認為疑點重重，倘若屬實，稱得上Mission Impossible，可以寫成本衛斯理現實版科幻故事「賺鑊金」。股榮搵唔到倪震，只好找來周顯解釋一番。
股榮：你話倪震買了約400萬元，平均價是1.2至1.3元，是他自己講抑或你自己估估吓？4月10日中午恒力復牌，就算第一個飛入場買貨，開市價已經是1蚊，較停牌前0.345元，高出接近兩倍，但成交股數只有1.4萬股。股價之後越上越快，按彭博資訊機，於1.3元或以下成交的股數只有15.4萬股，即使在1.8元或以下全數掃入，亦只得91萬股。就算倪震真的一開波不問價買了400萬元貨，平均價要1.85元，買得216萬股。
周顯：倪震冇講到平均價，只是講一開波就掃，一直掃到1.7元附近，平均價是我估的。隨後幾日，股價當回落到1.7元附近、他再增持也說不定，但我估佢累積購入金額應有數百萬。
股榮：恒力於5月31日曾突破5蚊，最高見5.37元（當日5元或以上合共成交近2,300萬股），然後股價回軟至近日4.5元，倪震沽晒仲沽得咁靚，係咪收到風？
周顯：我知佢（倪震）買得重，5月31日及6月3日連續兩日大跌，我打畀佢諗住叫佢減磅，點知佢話已經喺5蚊走咗，話係我早前同佢講，5蚊樓上值博率唔高，佢賭開馬，值博率唔高就收手好正常。
要賺大錢 紀律重要過膽量
認識的周顯是個「八卦公」，經常收到料，夠膽用名人作題材，我沒懷疑事件的真確性，只是在細節上有所偏差。我亦不懷疑倪震買恒力賺大錢，但賺千萬卻有保留。對於周顯文章資料查證核實不足，股榮在此向讀者及網友道歉。
今次事件正好帶出投資者常問的問題，就是點解佢炒股賺錢，我炒股就輸錢。倪震贏錢，有兩點值得學習。第一，事前準備足。恒力2月下旬停牌，3月22日才發通告指出售65%股權予萬達，繼續停牌，直至4月10日中午發通告公佈詳情，午後復牌。萬達是甚麼背景，賣殼後有何憧憬，如果沒有事前準備及資料搜查，試問誰人夠膽當股價升了兩倍仍飛身撲入市。你可以說是投機炒作，但吃不到的葡萄總是酸的，憎人富貴無可奈何，何解不努力做功課，世上從沒有天掉下來的餡餅，炒股沒有速成法，事前準備及部署相當重要。
第二是值博率及紀律。股市說穿了，其實只是個接火棒的遊戲，人人都想低買高沽（buy low,sell high），但遇到突發市況，卻財演上身，最終變成高買低沽。前一分鐘仍然垂頭喪氣、講到個市唔掂冇得玩，轉眼間卻突然好友上身，唔買對唔住自己，這種欠紀律沒耐性的投資態度，輸死冇命賠。
事實上，無論倪震賺百萬又好，賺千萬都好，或者輸錢敗走，都唔關我事，佢都唔會分錢畀大家。佢同老散一樣，都係第一日復牌後先掃貨，如果只是信周顯一句話，忍到升近兩倍（假如平均價1.7元）、5蚊樓上先清貨，這種紀律更是難得。
贏大錢固然要有Guts，但紀律更重要。
股榮
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate