【本報訊】12年前一次偶然北上消費，令李太體會深圳衣食住行的廉宜，結果她與丈夫掏出90萬元人民幣在深圳福田購入一個1,250呎大單位，舉家「移民」深圳，打算過「上等人」生活。12年後的今日，李家贏了住房面積，但跑輸了人民幣升值通脹的壓力。
全家人生活的轉變，必須從12年前一次北上消費說起，李太還記得「當時拎住500港幣上深圳做豪客，揼骨、食飯，消夜直落，結果仲有錢剩，覺得同一價錢，喺深圳生活質素比香港好，結果同老公商量，扑槌喺深圳福田區買入1,250呎大單位，一家三口北上過上等人生活。」
動用退休金墊支過活
為免深港兩地奔波，丈夫與朋友在深圳合資開了一間小廠，月賺萬餘元人民幣，她誕下細女後，全職在深圳當家庭主婦，以為生活從此安穩。
然而，人民幣近年大幅升值，深圳生活指數直逼香港，甚至有過之而無不及。「10年前，一家三口包括供樓等所有開支，一個月一萬元港元綽綽有餘，但𠵱家冇2萬元人民幣都應付唔到，好似上個月我喺超市買包紅棗糕先31.8元，但今個月就加到52元，你話有幾離譜！」
李太嘆丈夫現時只有約一萬多元人民幣收入，不得不動用退休金墊支過活。
李太當初搬至深圳，一心想過上等人生活，結果港幣滙率一直跌不停，生活不斷貶值，自嘲現時過的是中下等人生活。
李太說：「我全家人好少外出食飯，餐餐都喺屋企煮，日用品多數透過網購或到超巿格價買入平靚正，家陣買嘢仲邊敢講牌子呀，慳得幾多就幾多。」
大部份人眼見人民幣升值，早已計劃搬番香港生活，但她說：「家中細女，出世至今都適應咗喺深圳生活，所以將來只考慮如何在內地發展。我唯一慶幸的是早年買咗間屋，可以住喺一個過千呎大單位，否則我都唔知喺內地生活係好咗定差咗。」
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate