【跑馬地→銅鑼灣】最近操到六嚿腹肌兼有完美人魚線嘅張家輝hit爆，連林盛斌（Bob）都要搽黑皮膚扮佢搞gag，點知家輝話老婆關詠荷睇完冇feel，梗係啦，48歲嘅關詠荷自己亦keep得唔錯，最重要係佢𠵱家全副心神放喺個女Brittany度，希望個女成材嘛。
廿四孝媽咪管接送
日前下晝兩點幾，關詠荷同囡囡Brittany離開跑馬地逸廬屋企，由司機揸車送兩母女去銅鑼灣某商業大廈。落車後，關詠荷幫囡囡攞埋書包仔，親自送佢去上英語拼音班，之後關詠荷就返屋企休息，大約3點幾再出動去接放學，果然係廿四孝媽咪。
過馬路時，關詠荷緊緊捉住囡囡隻手，萬二分小心，當佢哋行到去安全島時，由於馬路中心車多塵多，Brittany好醒目咁用手掩鼻免吸廢氣，真係叻女。其間有位喺對面馬路嘅同學仔，佢一見到Brittany即刻跑過嚟熱情打招呼，嚇到關詠荷呆咗，大叫佢小心啲，好彩當時馬路冇車咋，之後關詠荷就同囡囡上車返屋企喇。
採訪、攝影：彭琮然、梁繼光
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！