【隔牆對論】
記：《蘋果》記者
廖：廖淑華，聖士提反女子中學校友（中一至中五），現為中大一年級生
鄭：鄭子伶，聖士提反女子中學校友（幼稚園至中七），現為浸大三年級生
記：作為校友，為何反對母校轉直資？
廖：St. Stephen's喺三十年代開始提倡普及教育，轉直資後基層向上流動機會少咗，就算有20%助學金，或再加大個額，都唔及向所有人免費開放，轉制有違學校辦學宗旨，呢個係校友最concern。
對社會而言，津中變直資係將社區共有資源變成有錢人享有。我覺得要捍衞呢個社會流動階梯。我都係從呢個階梯升上大學，想話畀社會聽，有好多學校已經蠢蠢欲動，係唔係仲要逐間逐間咁轉呢？
鄭：學校有23個斜坡、有文物，冇咗教育局資助（直資校可向教育局申請非經常資助修葺斜坡，但金額要達200萬元），就要自己負責開支，家長畀3萬幾蚊學費，有幾多係直接用喺學生身上？
在教育局的語言微調政策下，一間中學獲派的中一生，如成績屬全港前列40%的人數，比例未達平均每班人數85%，不能選擇開英文班。中一人口未來數年下降，不少名校擔心收生質素下降，甚至降級開中文班。
記：轉直資後學校有更多學費收入、可以揀學生，更不用怕要開中文班，是不是更有利發展？
廖：資源可能多咗，但係用乜嘢trade off返嚟？好似交流團，學校一向都有，去到意大利仲攞埋獎。去多啲、去遠10公里就代表增值咗？反而學生背景變得單元，對學生認識社會仲不利。
鄭：學校𠵱家取錄緊八成學生係Band 1學生，另外兩成係Band 2頭，見唔到開中文班嘅可能性。中西區另一間女校（英華女學校）都有百年歷史，都面對緊同一啲收生問題，點解我哋就企唔住？係唔係校董會力有不逮？
記：是否認同直資學校有較大自主權，如在國民教育一役，男拔、聖保羅男女中學都可倖免開科。
廖：其實開唔開國教取決於辦學團體，家長擔心津中受教育局牽制，但直資某程度都受教育局資助。如果學校覺得現有教育制度唔好而逃避，呢種明哲保身嘅態度，唔係我喺St. Stephen's學到嘅嘢。
鄭：就算有一日津中要開國教，學界應該團結一致反對，唔係獨善其身，閂埋門覺得「我哋好安全喇」。要記住上次國教科被擱置都係因為一大班社會人士、學校同學生去爭取，令政府讓步。
「每間學校辦學理念都唔同，St. Stephen's嘅女仔係多元發展、學做人、對社會負責任，學校唔係每年ensure到有一批窮學生入到學就叫盡咗責任。」
記：不少名校已轉為直資，聖士提反遇到嘅反對聲音似乎最大，對學校冇信心？
廖：每間學校辦學理念都唔同，有人行精英主義，St. Stephen's嘅女仔係多元發展、學做人、對社會負責任，學校唔係每年ensure到有一批窮學生入到學就叫盡咗責任。我哋去諮詢會前未有立場，但見到連諮詢都做得唔好，真係令我哋懷疑學校轉制的規劃。
鄭：學校話公開聽意見，但諮詢會上迴避問題，又搵支持轉制嘅校友同家長拍片支持，冇問反對嘅人。我哋係關注長衫背後的價值。
記：有觀點認為統一派位制度不公平，而轉直資可以更公平收生，從而令全港學生都有機會入？
廖：就算全港學生都可以報，但跨區過嚟嘅，都係有錢人。如果連西環尾住劏房嘅學生都未照顧到，咁就唔應該標榜想照顧埋全港學生。
鄭：學校話附屬小學淨係收到附屬幼稚園約50%學生太少，其實數字仲未計叩門獲取錄嘅學生。附小係會優先取錄呢批幼稚園生，所以最終係有70至80%入學。
記：不少家長都希望子女入讀名校，亦不介意節衣縮食交學費，如果你是家長，如何揀學校？
廖：我唔係家長，但「品學兼優」都係品字行頭。假如我屋企好有錢，都想子女見到人哋筆袋冇咁靚，會反思吓自己原來好幸福。呢啲都係學習機會，重要過去更遠交流團。
鄭：有人話我哋因為個女可以「世襲」入學，先擔心冇咗呢個制度，我冇諗過呢個問題，況且轉直資後都可能計分，學校更有自主權，可能都會計你係唔係校友。
mailto:[email protected]
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate