今個暑假檔期電影，集中、港、台、日及荷李活電影，是近年難得一見的熱鬧，其中荷李活電影《超人：鋼鐵英雄》（Man of Steel）故事重新再拍，找來《蝙蝠俠》導演基斯杜化路倫（Christopher Nolan）擔任監製，是必看之選。港片代表自然是張家輝主演的《激戰》，單睇張家輝的筋肉身形已值回票價。
過往兩年暑假的電影，都是荷李活片的天下，《蜘蛛俠：驚世現身》（The Amazing Spider-Man）、《變形金剛：黑月降臨》（Transformer：Dark of the Moon）都是票房保證，反觀華語電影就乏善可陳，去年暑假只是爆冷跑出一部《低俗喜劇》。不過今年華語片扭轉過去兩年劣勢，較具看頭的電影就有八部之多，而且戲種多元化。
家輝：對住啲硬嘢
論到華語片最強，一般認為都是林超賢執導、影帝張家輝跟彭于晏合演的《激戰》，當中張家輝為角色苦練的六塊腹肌，近日引來全城熱話，完美體態惹來同志垂涎，令電影更具看頭。家輝變身成筋肉人，足以跟荷李活重頭電影《超人：鋼鐵英雄》對抗，撇開同樣是賣大隻肌男及強勁的CG製作，由英國新人亨利卡維（Henry Cavill）扮演超人，找來《蝙蝠俠》導演基斯杜化路倫擔任監製，故事亦重新由超人如何誕生說起，配角人選粒粒皆星，如羅素卻爾（Russell Crowe）、 奇雲高士拿（Kevin Costner）。
張家輝對《激戰》有一定信心，昨日身在大馬的他接受長途電話訪問，他直言票房很難比較，他說：「對住啲硬嘢，即係問我有冇錢咁解，你有冇錢？我有錢㗎，但我都幾窮，亦都有好多人窮過我，不過呢部片係一部好強電影，同過往林超賢嘅合作好唔同，同警匪冇關，亦都冇暴力，反而係一個勵志片，用一個殘忍運動去包裝，喺暑假檔係有威脅成份，自己有信心，但同人比較呢，又唔知人哋拍成點，亦唔知大家口味。」不過家輝坦言估不到自己一身朱古力肌肉，竟然會造就這麼大的宣傳作用，令他大感意外。
鄭秀文捧鹹濕飛虎
港產喜劇有彭浩翔監製的《飛虎出征》，承接去年《低俗》的氣勢，繼續以低俗為賣點，玩飛虎隊過大海尋歡。劇情片則有杜琪峯、韋家輝力作，劉德華和鄭秀文合演的《盲探》，鄭秀文昨日在電話中說：「好多謝杜琪峯畀我喺戲中變成一個咁癲狂嘅人，《盲》片有我同華仔，仲有杜琪峯呢個最佳組合，大家必睇。同埋都會去睇《飛虎出征》。」余文樂亦說：「當然捧番自己，總之包你笑到肚痛。」偶像劇就有由台灣藝人坐鎮，女神陳妍希跟李連杰、文章合作的電影《不二神探》。
其他較具叫座力的外語電影，包括卡通片在內亦有逾十部，不少是挾第一集票房賣座而開拍續集，包括《怪獸大學》、《藍精靈2》及日本電影《神探伽俐略2：真夏方程式》，當中飾演神探的日本型男福山雅治更會親臨香港宣傳，電影更標榜日本、香港同步上映。
採訪：李森
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！