明星搭港鐵唔係新奇事，國際影星周潤發都成日俾人影到搭港鐵同巴士，前日身兼全國政協委員嘅阿姐汪明荃亦都去咗搭港鐵，仲俾人偷拍擺上網㖭，有位自稱Ivylee嘅網友話：「明星不化妝也和我們一樣啊。」跟住整咗好多笑臉公仔。
「同車的緣份」
當時嘅阿姐冇化妝，着住黑衫牛仔褲，拎住個環保袋，打扮同普通師奶冇乜分別。戴住眼鏡嘅阿姐一上車就做低頭族，只係顧住不停玩手機，但唔好以為阿姐俾人偷影都唔知，原來佢早有一着，噚日仲放咗張反拍相tag呢位網友話：「在地鐵裏乘客只有一個手勢，就是打手機，早就知你拍了我，現在我回你一張，同車的緣份。哈哈哈，好玩！」不過阿姐似乎認錯人，佢影嗰位好似唔係影佢相嘅網友。阿姐至截稿前仍未回覆，唔知佢知唔知自己搞錯呢？不過，仍然有好多粉絲留言撐阿姐，何韻詩都留言：「哈哈這招不錯，我的queen媽就是有這種不為人知的幽默感……。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！