飛鷹首奪常規賽冠軍！噚晚喺灣仔修頓室內場上演嘅甲一常規賽煞科戰，南華以74:88不敵永倫，造就飛鷹憑較佳對賽成績，力壓同得6勝1負嘅永倫，首嘗常規賽錦標滋味！
永倫噚晚同南華合演嘅「華倫大戰」，吸引過千球迷幾乎逼爆修頓，氣氛high爆。當中永倫洋將賀斯福完半場前，一度接應潘志豪界外球表演「拆你屋」，協助球隊入更衣室前領先31:28，搶盡風頭。
易邊後，永倫同南華各打一段好波，各不相讓下，最終賽前已無望爭標嘅永倫，14分之差擊敗南華。由於永倫與飛鷹同樣6勝1負，但後者憑較佳對賽成績，首次做常規賽盟主，難怪觀眾席上嘅飛鷹前鋒呂楚威好興奮。
至於福建頭場憑劉子禮攻入全場最高18分，以102:72大炒安青，屈居南華之後得第4。3場2勝制嘅季後賽將於下周二喺同地上演。
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate