艾殊利高爾（A高）第日掛靴唔做藍血人，睇嚟可以頂咗松田翔太個位做潮男星人。點解？因為呢位32歲英格蘭國腳真係好大汗，搵佢拍嗰個hit爆嘅止汗香體巾廣告，肯定襯到絕！
2012/13球季英超經已完咗，唔使踢太公波嘅球員就可以放暑假。車路士陣中3個英格蘭老嘢分道揚鑣，A高去咗美國，林伯同泰利就分別去咗西班牙同葡萄牙。
係人都知A高喜愛夜蒲，有夜場嘅地方就有佢嘅身影；周日佢幫英格蘭踢完作客對巴西嘅友賽後，轉頭就飛去美國度假，仲狂蒲夜店𠝹女。日前佢就俾狗仔隊影到去洛杉磯嘅蒲點Vignette玩，仲蒲到深夜時份先鬆人；但最離奇嘅係，佢走人嘅時候，右邊胳肋底竟然濕晒。
LA喪蒲出事
我求大俠喺度諗，應該係A高跳舞時太過落力，先至搞到胳肋底有撻汗迹；但夜店啲冷氣咁勁，佢都可以濕成咁，睇嚟真係好大汗。如果當時佢身上有潮男星人推介嘅止汗香體巾，即刻攞出嚟印一印，咪唔會有咁尷尬嘅場面出現囉。話時話，消息話佢成日過美國，除咗玩之外，仲係為第日掛靴鋪路；事關佢覺得自己「型英帥靚正」，想好似前英超球星雲尼鍾斯咁做演員，去荷李活發展。
林伯同泰利曬日光浴
A高做夜鬼，但佢兩個藍血人隊友林柏特同埋泰利，就走去同陽光玩遊戲。同車仔續咗一年約嘅林伯，同佢另一半碧琪莉，加埋班親戚朋友，去咗西班牙玩；呢位34歲中場仲喺遊艇度一邊曬日光浴，一邊飲汽水同吹水，認真識嘆。
至於盛傳過檔法甲升班馬摩納哥嘅32歲後衞泰利，就同老婆東妮去咗葡萄牙嘆世界，仲問朋友借咗艘價值43萬鎊嘅遊艇出海玩㖭。
【蘋果動新聞】Android App 修正版上架
回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate