【《蘋果》康城專訪】
康城影展多少變質，焦點總落在紅地毯上女星的爭艷場面，特別近年多了一批華人艷女在鬥麗。
時光倒流回到70年代，地點同樣是康城，已故的胡金銓導演帶了一位「俠女」踏上紅地毯，當年她曾為自己許諾，有朝一日必定摘下最高榮譽的金棕櫚獎。18年後她憑監製的《霸王別姬》達成願望，雖要打理先夫的房地產生意，但無阻她對電影的使命感，因為她覺得「人的生命有限，好的電影卻可永遠流傳。」近年她再接再厲重踏闊別多時的電影圈，成立娛樂公司在電影江湖上打拼，她是永遠的俠女──徐楓。
撰文：文國駿
徐楓憑電影《俠女》闖出名堂，戲中橫眉冷對千夫指的女俠，當年殺死不少少男，女俠形象深植人心，及後棄影從商接管先夫湯君年的生意，貴為上市集團主席。日前她在法國康城接受本報專訪，現年62歲的徐楓俠女風範依然，說話中氣十足，即使提到以往患抑鬱症的低潮時，仍可樂觀細說，俠女稱號不只是電影角色，而是對生命、對電影的不屈不撓。
演員與女工
徐楓記得第一次與電影結緣始於66年，用上「緣」字是因為一切是命運使然，她娓娓道來：「我仲記得嗰時屋企好窮，我5、6歲時爸爸走咗，媽媽改嫁，我當時讀夜校都係自己負責，一講去讀書後父就面有難色，我亦係屋企入面嘅老大，要負責任，嗰陣我見《龍門客棧》胡金銓導演招募演員，我就分別去應徵演員同埋另一份電子工廠女工 ，結果演員通告比女工早咗一個禮拜，我就開始咗我喺影圈嘅日子。」
四千多人中只挑選6男6女，胡導其後開始訓練他們的功夫、普通話及演技，徐楓坦言當時只有16歲的她只當電影是謀生工具，未有產生濃厚興趣或熱愛，談到與導演的關係，徐楓恭敬地表示胡金銓是一位嚴師，自己在對方眼中永遠只是16歲的徐楓，她說：「導演係一個嚴師，一直到佢走都係，我哋唔係朋友，做老闆時同師傅合作拍片都係保持師徒關係，佢覺得畀我電影知識，我點同佢講電影，喺佢眼中我永遠冇長大過。
誓奪金棕櫚
其後胡導找徐楓擔任《俠女》女主角，令她的演戲生涯直上高峯，更憑此片於75年首次踏足康城影展，是一個令她真心愛上電影的契機，她說：「我哋拍時冇諗過《俠女》可以咁大迴響，係第一次有中國電影入圍競賽片，我仲記得我當時嚟到乜都唔識，之後喺紅地毯同首映後發覺原來拍一套好戲可以得到人哋咁大尊重，嗰時開始我對拍好電影有不同感覺，對我影響好大。我喺咁細個時胡導帶我嚟呢邊，畀我一個唔同嘅國際觀念，帶我見世面，對我人生好大影響。而嗰年康城我記得頒獎禮時胡導上台領獎，係一張紙，我發覺只有最佳影片金棕櫚先係獎座，我嗰刻同自己講一定要拎到呢個獎。」
說到做到，是徐楓多年來的格言，75年時年少無知對自己許下的承諾，於18年後真的做到了，93年由徐楓監製、陳凱歌執導及張國榮主演的《霸王別姬》得到康城最高榮譽金棕櫚獎，徐楓坦言這是她光影事業中的一個高峯，她說：「《霸王別姬》當然係我一個高峯，我仲記得有一年喺康城睇咗陳凱歌嘅《孩子王》，所有人都話悶，但我睇得出佢想拍嘅意思，我買咗《霸王別姬》小說版權後就搵佢傾，但佢開頭覺得故事好商業，唔係好想拍，我用咗一年幾說服佢，結果有呢個佳績，我做人唔理幾難，講得出，有目標就一定要做得到，人冇理想都冇必要活下去，只要肯堅持就一定可以做得到。」
欣賞張國榮
談到《霸王別姬》，當中不能不提主角哥哥張國榮，適逢今年是哥哥離開十年，徐楓坦言對哥哥的一切仍歷歷在目，她說：「張國榮係一個好有魅力同才華，獨一無二嘅人，佢好nice，我記得嗰時我去探班，佢會捉實我手問佢演得好唔好，佢當時好有把握演得好，喺開鏡前我同佢講一定要全力以赴義無反顧，結果拍完後佢送我一張簽名相，仲寫上『義無反顧張國榮』，佢想話畀我聽佢做到咗，張國榮就係一個咁有心嘅人。」
至於與康城影展的淵源，徐楓坦言康城是自己的另一個家，她說：「86年成立電影公司，88年帶咗十幾套電影嚟康城賣片，嗰時只係租攤位同請繙譯等等都用咗我一百幾十萬美金，嗰時台灣記者都當我係笑話咁講，結果我有片賣咗五、六十個國家賺咗好多錢，康城帶畀我好多名與利，而康城影展喺98年頒咗個『最傑出製片人獎』畀我，當時影展主席都話我係康城家庭一分子，因為呢個影展睇住我從演員，到老闆同製片人，可以話係睇住我長大。」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！