「咪神」徐淑敏（Suki）早兩日出席活動話諗住唔撈，全身退出娛樂圈，咁又係嘅，佢老公黃浩同曾志偉單嘢搞到咁大，真係好難再喺呢度立足。Suki家陣好似飽歷風霜，做咗人妻，又生咗兩個女，查實統統喺七年內發生。
話說06年，22歲嘅Suki面試港姐，因為住青衣，個樣有啲似薛凱琪，所以有「青衣薛凱琪」之稱，𠵱家諗番真係得啖笑。本身係模特兒嘅佢，有樣有身材，面試時已經超晒班，亦瞬間俾傳媒煲為大熱。點知入到直路，Suki因為壓力大而跌晒watt，後尾仲俾人踢爆同大佢27年嘅工程師男友搞忘年戀，最後比賽當晚三甲不入，只係得個旅遊大使獎。至於當年嘅冠軍？咪係盛傳匿埋加國安胎嘅陳茵媺囉！
後來，Suki同工程師男友分手，識咗黃浩，同黃浩結婚，生咗兩個女，到𠵱家打算退出。來去匆匆，其實大家最記得同最唔捨得嘅，應該係本文首兩個字。
撰文：阿Wow
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！