晉佳上期講到，未來兩三個月內，應該可以睇到港股大方向係大升定大跌。不過，恒指9RSI噚日跌到去24.55，唔少弱勢股RSI都更跌見10水平，嚴重超賣，似等反彈多過就嚟大跌，相信就算日後係開細，暫時都未有條件形成恐慌性拋售，至少會出現一個短線反彈浪，引投資者再落場坐貨，先有可能觸發更大幅度下跌。
如果嚟緊真係出現反彈浪，到時中長線投資者要一邊聞吓臭味，睇吓開大定開細，再決定買貨定沽貨。至於博大市反彈，最好都揀基本因素較佳、炒緊向上嘅強勢股，例如之前介紹過，有重組概念嘅珠江船務（560）、儀征化纖（1033）；至於殘爆股份，晉佳唔敢講博反彈勝算低，但只限短線，包括玖龍紙業（2689）、東航（670）及南航（1055）。
息口向上不利重債股
三股嘅共通點係重債，喺近排市場憂慮息口向上嘅情況下，呢類重債股成為輸家，至於股價跌勢足夠反映息口向上因素未？晉佳覺得未，因為美元重新進入加息周期嘅話，長線息率升幾多厘真係唔敢講，而息率上升會侵蝕利潤率，同時公司減債持續困難嘅話，就會進入死局。賺唔到錢，到時股價再平都未必值。
玖紙中期業績顯示，總負債達307億元人民幣，年度化年息約5.2厘，半年財務支出8.04億元人民幣，仲多過半年利潤6.58億元人民幣。假設其他情況不變，粗略計算，如果年息升到去7.4厘，利潤就會勁削一半。
利息開支負擔大增，盈利能力同時下降，會損害公司嘅融資同還款能力，到時銀行會要求更高利息去平衡風險回報，形成惡性循環。換言之，玖紙貸款若加息兩厘，實際盈利未必只係燒咗一半咁少。咁不利嘅形勢下，佢股價由3月高位7.94元，跌到去噚日5.05元，累積跌幅36%，實在合理不過。
重債股基本因素急轉直下，長線絕對捱唔過，短線博反彈，記住轉身要快，否則想報仇都難。
晉佳
本欄逢周一、三及五刊出
Hit一o下，動全新
即刻去Google Play Store, 下載【蘋果動新聞】新版Android App:
http://bit.ly/appledailyupdate
自力更新方法：
1)到 Play Store
2)搜尋「Apple Daily」
3)登入蘋果動新聞App
4)按更新，即可動全新
iPhone新版App，將於7月登陸