【銅鑼灣開平道】有「名牌潘」之稱、現年57歲嘅潘迪生，前晚7點15分左右，坐住佢架掛上自訂車牌「1R0N MAN」、價值500萬嘅Bentley房車現身銅鑼灣開平道，佢入咗意大利餐廳da Domenico食晚飯，呢間餐廳近排大熱，有好多圈中人鍾意幫襯，好似葉蒨文同林子祥、李嘉欣兩公婆都係常客。
Amanda老公好細心
潘迪生一身輕便打扮，不過佢身邊就好大陣仗，一落車已經有四名保鑣幫佢開路同開門。差不多同一時間，另一部七人車載住佢太太余桂珠同仔女嚟會合，潘太貫徹高貴打扮現身。一家幾口餐飯食咗兩個鐘，走嘅時候，幾名保鑣負責開門，潘迪生嘅仔女同老婆行先，佢自己就施施然殿後，見佢滿面笑容，睇嚟好滿意餐飯，之後佢哋一家坐架七人車離開。
另外，名模Amanda S.同佢位外籍老公前晚咁啱喺度食飯，兩夫婦比潘迪生早少少走。Amanda老公好有風度，過馬路時候望清楚至拖老婆行，上的士之前仲幫老婆開埋門，果然係廿四孝老公。
採訪、攝影：黃曉程、朱志聰、吳耀輝
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！