曾經效力車路士嘅德國中場波歷克，喺周三舉行星光熠熠嘅告別賽，由波歷克朋友隊鬥世界明星隊。啱啱落實回歸車仔執教嘅摩連奴，負責帶領世界明星隊，陣中有杜奧巴、舒夫真高、馬隆達同卡維奴等車仔舊將，亦有盛傳會上車嘅舒賀爾尼，仲未正式領軍就先嚟一次模擬揸「車」。
場告別賽喺德國萊比錫舉行，波歷克朋友隊清一色由德國人組成，包括高路斯、基斯頓、禾恩斯、夏文同埋F1車神舒密加；世界明星隊除咗一班效力過車路士嘅球員之外，亦有列文、貝碧托夫同焦點人物舒賀爾尼撐場。
順便斟舒賀爾尼
點解話呢位利華古遜翼鋒係焦點人物？無他嘅，盛傳佢係摩連奴入主後車路士第一單收購，呢場波正好畀摩帥睇吓辦；加上對手教練係利華高層禾拉，實行可以喺賽後密密斟。舒賀爾尼喺賽後話：「我同摩連奴係有傾過吓，只係因為佢係我隊波嘅教練啫。下季會唔會成為車路士球員？大家放長雙眼睇吓點喇。」對於摩帥回歸車路士，同佢合作過一季多啲嘅波歷克，喺賽前就舉腳贊成：「呢個係非常美妙嘅決定，佢係一位充滿個性嘅偉大教練，以佢嘅年紀贏到咁多冠軍，實在難以置信。」
講咗咁耐，幾乎唔記得講場波最後比數。波歷克始終係告別賽嘅主角，佢喺上下半場各踢一隊，結果有3球進賬，而杜奧巴亦寶刀未老梅開二度；世界明星隊險勝4:3。場波未完嘅時候，球證提早吹雞完場，球場亦熄燈，之後有射燈射住波歷克；佢同班球員一一擁抱，之後帶住3個囝囝繞場同球迷揮手告別，場面都幾感人。
另外，車路士除咗領隊之外，連球場草皮都送舊迎新。最近喺史丹福橋球場上嘅草地已經全部鏟走晒，球場變咗大沙地；不過球迷唔使驚，球會只係做緊重鋪草皮工程，到下季開始之前會變番全新靚草場㗎喇。
Hit一o下，動全新
即刻去Google Play Store, 下載【蘋果動新聞】新版Android App:
http://bit.ly/appledailyupdate
自力更新方法：
1)到 Play Store
2)搜尋「Apple Daily」
3)登入蘋果動新聞App
4)按更新，即可動全新
iPhone新版App，將於7月登陸