【本報訊】被有國企背景的中國海外發展以高價搶先「佔領」首兩幅港人港地的啟德發展區（啟德城），發展商及業界均預期，該區未來一定會晉身中高檔商業及豪宅區，低密度住宅區實用呎價隨時逼近4萬元；另恒地主席李兆基昨失落兩幅港人港地未感失望，更自嘲「我哋出唔到咁高價（競投）」弦外之音都費事同人爭。
記者：林志光 陳健文
啟德城由前啟德機場與周邊土瓜灣、九龍城及九龍灣區相連土地組成，佔地約323公頃，政府銳意打造為集文娛體育及旅遊消閒於一體的全新城中城，預計全區容納居住人口不足9萬人，密度極低，加上政府近年更將啟德連同九龍灣至觀塘的九龍東，提升為本港第二個金融商業核心區，形同把啟德塑造另一個九龍站豪宅區。
四叔：預咗唔夠人哋投
有說本地發展商出價保守，恒地（012）主席李兆基昨於美麗華（071）股東會後表示，承認集團有落標競投，指成交價「唔係唔合理，只係貴少少咁解啫」，而集團都「預咗唔夠人哋投」。他說︰「我哋出唔到咁高價（競投），我哋喺舊樓重建度有幾十個地盤，儲備好多，所以我哋唔急於投，平價我哋先至投，太貴我哋唔會投……買嘢（買地）都要錢㗎！」
港人港地政策最終結果仍是以高價投得地皮，是否有違政策原意，四叔並沒有直接回應 。「有港人港地同無港人港地（政策），幅地都唔會爭好多錢啫，都只係少啲大陸人嚟買咁解。」日後港人會否很難才能買到相關地皮所興建的樓盤？他指「呢啲我唔知」。
對於今次港人港地是由內地企業投得，是否有人有心搶高價格，李兆基認為機會不大。他說：「照睇應該唔係有心搶高……佢（中國海外）都只係想立足香港，咁大間公司，想試吓，貴些少都無問題。」九倉主席吳光正股東會後認為，中標價格屬市價，並非不合理，並認為市場增加參與者並非壞事。
發展局局長陳茂波昨被問到投標價高，落成呎價可能過萬元，他重申除了港人港地政策外，解決房屋問題，需要增加供應。
第一太平戴維斯陳超國指出，啟德是市區全新發展區，既有郵輪碼頭概念，又有鐵路等大型基建支援，絕對可打造成一個類似西九龍一帶的中高檔居住區域，其中沿跑道而建的中低密度住宅，其實用呎價可高達4萬元水平。
區內三幅地皮明年初推售
高緯環球大中華區評值及專業顧問部董事張翹楚同樣認為，啟德將來可打造為一個檔次介乎大角嘴奧運站與尖沙嘴九龍站之間的一個高檔住宅區，因除郵輪碼頭及鐵路外，其連周邊整個九龍東更視為本港第二個金融中心區，東西幹線走向貫通整個九龍區，以致港島中區，所以，如現時有住宅，其平均實用面積呎價約1.6萬元水平，未來有更大的升值潛力。
政府由今年至2019年前，會將區內近1,000萬方呎樓面的私人住宅發展用地，陸續推出市場，提供約1.7萬伙單位，除剛售出的兩幅港人港地外，還有三幅地已納入在本年度賣地計劃之內，最快明年初可出售。同地段內分別建有公屋和商業大廈等物業，住公屋（約1.3萬伙）也可享用同一個海景和區內公共設施。
【市民意見】
啟德勢成豪宅區
屯門業主董先生：「政府想㩒地價，但首幅港人港地已經做唔到，日後啟德一帶絕對有機會變成豪宅區……批地唔應該只批畀最高價，仲要睇其他發展因素同條款。」
買其他私樓好過
啟德街坊雷先生：「市區太少地，就算出大堆限制都好難令地價跌……不過地價都咁貴，第日賣出去個價都未必平過同區二手樓，買其他私樓好過，起碼冇轉售限制。」
【網民洗版】
港人港地被插失敗
Gary Lky：證明CY做嘢真係唔經大腦，繼白癡免補地價居屋，大托樓巿之後又一力作！
Raymond Ha：港人港地，卻竟然不是港資，這卻是一大笑話，提議者得把口講！倒不如叫「國人國地」仲貼切！
邱芳：家庭中位數月入兩、三萬的打工仔，點供千五萬樓？開玩笑！CY，仲要short幾多年……
Blue Pluto：港人港地？冇咗啦……我哋要多謝屍歪，係佢教識我哋乜叫講大話都面不改容！
資料來源：蘋果網頁
Hit一o下，動全新
即刻去Google Play Store, 下載【蘋果動新聞】新版Android App:
http://bit.ly/appledailyupdate
自力更新方法：
1)到 Play Store
2)搜尋「Apple Daily」
3)登入蘋果動新聞App
4)按更新，即可動全新
iPhone新版App，將於7月登陸