編按：是日由盧主席秘書Joycelyn執筆。
早個零月，Selina約我出嚟飲嘢，順便派帖，照計新婚在即，應是如沐春風，幸福滿溢。但都被我發現她當晚的笑容，竟好幾次閃過一瞬的牽強，我暗生疑竇。跟住一把攬住她，關心地問：「點呀？婚禮好多嘢搞，好煩呀？有冇嘢需要我幫手，即管出聲，一定兩脇插刀，在所不辭！」她望住我，欲言又止，「冇呀！」然後低頭輕酌，仲話冇嘢！已是眼眶盈淚。
還是忍不住托出「Joycelyn，你知唔知Peter前晚話約我食飯攞帖，我其實都冇諗住請佢飲，點知去到。佢已安排咗燭光晚餐，仲突然向我求婚。佢喊咗好耐同埋跪咗好耐都唔肯起身，嗰陣我真係唔知點算。」我驚訝地張大嘴巴，差點把口中的Rosé也嗆出來。「Peter玩你呀？一早又唔肯結婚，𠵱家先嚟求婚？佢到時會唔會好似許文強咁搶婚呀？」
Peter是Selina拍了好多年拖的ex，一年前，他突然提出分手，原因是雙方目標不一。那時，Selina哭得死去活來，黯然傷感了整整兩個月，我哋成班姊妹個個都歷歷在目。
Peter是一個高大開朗、充滿童真的大男孩，名副其實的kidult，雖然收入不錯，卻有太多的燒錢嗜好，相機、手錶、品茗和享受「月光（族）」。Selina是一個高度小鳥依人，憧憬家庭生活的女生，總希望快點儲到首期買樓、結婚，在變成高齡產婦之前生小朋友。平時Peter非常風趣健談，口若懸河，但一講到結婚生仔的話題，即刻收聲。加上男方覺得女方迫自己儲錢的力度越見加大，所以主動提出分手。
Selina的初戀男朋友Eric得知她甩拖後，即刻展開猛烈攻勢。事實上，Eric對她的愛錫程度應教眾男無話可說。每個禮拜必定製造驚喜，送小禮物、公仔、鮮花不在話下。一知道Selina想買樓組織自己的家庭，即刻喺復活節期間扑鎚，和她聯名置業。為免夜長夢多，更速戰速決，擇日兩個月後舉行婚禮。Eric工作亦忙，又唔捨得Selina太費心籌備婚禮，所以委托了wedding planner公司包辦一切繁文縟節。根據各方面的環境證供，我好肯定，Eric絕對是一個模範男朋友……應係老公。
惟我亦知Selina和Peter分手後仍有聯絡，也猜到她對他一直不能忘情，Peter突然求婚的舉動一定會令此女心亂如麻，不知如何取捨。所以我單刀直入問：「你有冇將Peter求婚嘅事話畀你『未婚夫』聽呀？」我特別强調「未婚夫」三個字，只望提醒Selina她沒多久就要披上嫁衣，成為人妻。
不求浪漫 要金要安心
她嘆了一口氣：「冇呀！」我看着這副懊惱表情，再試探性地問了一句：「你愛邊個多啲？」也許是酒精的作用，Selina滔滔不絕地說出心底話：「如果我愛Eric多啲嘅話，我就唔使咁煩，直接同佢結婚就得。但我真係心裏面仲有Peter。唉，點解個天要玩我，Peter竟然又向我求婚？如果Peter唔求婚，我認命嫁畀Eric就算，乜都唔使諗。」
「你唔會打算做走佬新娘吓嘛？」她無可奈何的搖搖頭。「唉，我仲可以咩？以前後生，喺眾多追求者當中最後揀咗Peter，因為佢好似大細路咁，十分風趣可愛。但家陣秤身家的話，呢幾年，Peter肯定係人工加咗，結餘少咗，而我就年紀大咗。你都知我又想生小朋友，我唔奢求老公畀我過少奶奶嘅生活，但起碼要畀我一份安心，自己照顧好自己。唔通將來BB肚餓嗰陣，我同人講嗰仔唔使同人爭奶粉，因為我可以沖Peter嘅私人珍藏陳年普洱畀佢飲？」
「唉，年少多好？！」Selina嘆了一口氣，把手中的Bloody Mary一飲而盡，我亦將最後嗰啖Rosé敬畀自己仍有的「青春」。我呢位好姐妹Selina還是做了「中女的選擇」，而我亦都揀咗着新買嘅嗰件Paule Ka出席她明天的婚禮。謹此祝佢新婚愉快。
Joycelyn
Hit一o下，動全新
即刻去Google Play Store, 下載【蘋果動新聞】新版Android App:
http://bit.ly/appledailyupdate
自力更新方法：
1)到 Play Store
2)搜尋「Apple Daily」
3)登入蘋果動新聞App
4)按更新，即可動全新
iPhone新版App，將於7月登陸