影帝張家輝近排一輯肌肉照，睇到網民嘩嘩聲，佢為咗林超賢嘅電影《激戰》，鍛煉身體操出大隻身材，練出六塊腹肌之外，更練成近排好hit嘅「人魚線」。
昨日動記者吉吉同Mike就搵教練，教大家重點鍛鍊腹肌同人魚線。健身教練Eunice表示每個人嘅體質唔同，所練習嘅方式都會有所不同。Eunice指Mike平日都有做GYM，所以Mike試範嘅以下五個動作係難度較高。
1.TRX Crunch
2.Medicine ball Russian twist
3.Fit Ball Oblique Crunch
4.Crunch & Twist with Dumbbell
5.Torso Twist
教練仲話要配合做適量既帶氧運動，達至消脂，「朱古力」就會好快出現。家輝話：「起初鹽、油、糖、澱粉質一定冇，中段要日食二、三十隻雞蛋白，差唔多去到影相前，要淨食3日白飯，靠澱粉質使肌肉膨脹。去到最後階段要脫水，每次飲水都只係濕濕嘴角，務求收乾水份令線條更出。」不過其間令小便起泡，乾得唔使去廁所。
對於張家輝嘅極級做GYM方法，對健康會唔會有影響呢？方玉輝醫生就話：「如果係短時間內戒鹽、油、糖、澱粉質，一般成年人係冇太大問題。脫水就要留意，脫水無疑係可以收乾水份令線條更突出，亦會減少小便頻率，但有機會影響腎功能，嚴重更有機會急性腎衰竭。」
個個男士都想擁有大隻身材，不過記得要用安全同健康嘅方法。保持適量運動、均衡飲食、足夠休息，健康自然埋你身喇！
場地提供:Fitness First
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！