兩日前，孫柏文講過香港賽馬會，1975年前係一班為自己騎、練、跑馬興趣入會嘅會員，因為大局為重，知道犯罪集團嘅外圍馬嚴重影響社會治安，所以就算會令人覺得賽馬運動係賭博，都支持職業化同開場外投注站。
有啲人會話：「賽馬唔係賭博？係咩？」或望住大賽例如國際賽或打吡冠軍馬嘅獎金超過100萬美元，就話啲馬主係為賺錢「投資」，所以養馬。
講畀大家知，呢個係絕對錯。如果計數，一年嘅基本養馬費（即唔包括病痛睇獸醫等）係大約平均一場普通頭馬嘅獎金。香港現有千幾隻馬，不過每年只跑700幾場，仲要未包括你買馬同來港機票嘅錢，所以你哋自己計。
咁冇錢賺又養馬？因為係一種挑戰。對一班喺自己行業已到咗「無敵是最寂寞」嘅人，喺養馬嘅過程中，再尋找嗰種要謙卑嘅感覺。
無他，因馬係哺乳類動物中，腦比體積最細，即最唔聰明、唔聽話嘅動物。即每場14（老豆話如包括騎師28）隻唔完全聽話嘅動物。仲要馬唔係法拉利，唔係話入廠整整就得，比細路考試更難準備。
最心傷又最high
而養馬最大挑戰，就係面對咁多好似好難控制嘅因素下，都可以喺一場馬開跑前，同鄉親父老話：「今日我隻馬贏！」而之後又真係贏，就證明你人勝天之能力！更唔好話跑打吡呢啲一定要調到嗰日贏，隻馬一生一次機會嘅賽事。
馬主係全馬場最啞子吃黃蓮嘅一群，因為好多時，佢哋對隻馬機會因評分都係博博吓。有馬主仲估冇機會時，向好友話唔好買，點知跑贏，就畀啲朋友狂炳，被鬧「都唔係真朋友」。所以賽馬養馬一定唔係投資，而係一項可以最心傷同時又最high嘅運動。要賺錢、投資，沽日圓、買白銀好過。
孫柏文
獨立股評人
http://facebook.com/shuen
本欄逢周二、四刊出
Hit一o下，動全新
即刻去Google Play Store, 下載【蘋果動新聞】新版Android App:
http://bit.ly/appledailyupdate
自力更新方法：
1)到 Play Store
2)搜尋「Apple Daily」
3)登入蘋果動新聞App
4)按更新，即可動全新
iPhone新版App，將於7月登陸