娛樂圈近半年發生好多官非，曾志偉同組合24味兩成員分別涉嫌打人被捕。不過咁啱兩單案噚日都結束，三人齊齊冇事。
志偉舊年12月出席落選港姐鄭嘉雯婚宴時，佢疑為藝人飯局事件出頭，同徐淑敏老公黃浩起爭執，志偉涉嫌掌摑黃浩被捕，佢一直保釋候查。據知，志偉噚日3點去咗警署報到，之後就無條件獲釋，馮仁昭噚日聯絡警察公共關係科求證，當值新聞主任回覆話：「去年12月5日晚在金鐘發生的一宗普通襲擊及刑事恐嚇案，警方經調查及諮詢法律意見後，一名60歲曾被捕男子已獲無條件釋放。」身處日本嘅黃浩話未接到通知，佢透過短訊回覆：「我不知發生甚麼事，不願置評。」直至截稿，馮仁昭仍未得志偉回覆。
Eason求情信冇呈堂
而組合24味成員梁永傑同陳偉雄（阿肥）涉嫌舊年4月喺中環Club Fly打人，被控意圖傷人罪，噚日喺灣仔區域法院宣判，兩人都無罪釋放。之後佢哋喺法院門外接受訪問，阿傑話：「都算放下心頭大石。」早前有指陳奕迅（Eason）幫阿傑寫求情信，阿傑話：「Eason係幫我寫求情信，但後來話要佢上庭，我唔想麻煩佢，冇呈上庭，我都冇睇到，所以唔知佢寫乜嘢。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！