西甲皇家馬德里今季3大主要錦標落空，只係季初贏巴塞拎咗個西超盃呢個安慰獎，連寸王摩連奴都走埋去車路士；不過點都好，基斯坦奴朗拿度（C朗）始終係皇馬表現最好嘅球員，仲入埋《馬卡報》今季西甲最佳陣容之一；但據報C朗就加人工同皇馬傾唔掂數，打算唔續約兼密謀賣走佢喺馬德里間豪宅，做晒離隊準備。
扮對紅魔未忘情
佩雷斯順利連任皇馬會長，但呢排佢嘅收購行動就屢受挫折，尼馬唔夠巴塞爭，想買加里夫巴利仲係冇米粥，堂堂銀河艦隊，點都要有幾粒星撐場，佩雷斯梗係唔想C朗走啦。不過皇馬同C朗合約喺2015年屆滿，C朗提出續約要求，係加薪後年薪除稅後達2,000萬歐元（約2億港元），同𠵱家1,200萬歐元好似相差唔遠，不過西班牙政府取消咗「碧咸條款」呢個稅務優惠後，高薪外援稅率由25%升到上52%；即係如果要滿足C朗嘅要求，皇馬每年就要支出4,200萬歐元，出人工兼幫佢交稅，佩雷斯撳爛個計數機都搞唔掂。加薪唔成，隨即傳出C朗唔打算續約嘅消息。
28歲嘅C朗雖然算得上俊男一名，不過都深明「港女屈男友」招數；好似佢就放風以540萬歐元求售佢間位於馬德里嘅大宅，擺明對皇馬冇留戀咁；C朗個人instagram剛過一百萬粉絲，佢就放張組圖多謝球迷，雖然大相仲係皇馬踢波相，但左下角就放張同前曼聯領隊費Sir嘅合照，扮到對母會紅魔鬼好懷念咁。
傳莫耶斯想要C朗
咁講真，成個歐洲出得起錢收購C朗嘅球會又真係唔多；曼聯新任領隊莫耶斯剛上任，當然希望買番粒星撐場，據報又考慮會提出斟介。原本車仔都有錢，不過C朗同摩連奴呢排又鬧不和，摩連奴接受訪問表示，與C朗緣盡，並批評他不聽教練指示，再不會收留他。不過點都好，C朗如果真係唔續約，佩雷斯肯定想盡快甩手，收番啲轉會費都好。
Hit一o下，動全新
即刻去Google Play Store, 下載【蘋果動新聞】新版Android App:
http://bit.ly/appledailyupdate
自力更新方法：
1)到 Play Store
2)搜尋「Apple Daily」
3)登入蘋果動新聞App
4)按更新，即可動全新
iPhone新版App，將於7月登陸