可能因為大眾要求政府發新免費電視牌照嘅聲音越嚟越大，搞到無綫呢排好鬼生性同有上進心，繼豪擲四億買2014巴西世界盃嘅播映權後，又攞埋「洲際國家盃2013」同「世青盃2013」嘅播映權，似為出年播世界盃熱身，無綫咁積極嘅態度，真係令人欣慰！
捲高Tee露腰
無綫噚日喺尖沙嘴一間酒店舉行記者會，宣佈本月15日至下月1日，全程直播共16場嘅洲際國家盃賽事，仲有緊接嘅世青盃，亦會播5場關鍵賽事。高層余詠珊、衛世輝，仲有喺無綫講波唔少得嘅陳百祥（阿叻）等出席記者會，不過論搶鏡，都係2010年港姐冠軍陳庭欣最叻，啱啱喺日本血拼完又病到失聲嘅佢，捲高大會件tee露腰搶鏡，仲話自己把聲沙到啲朋友以為佢失身喎！有冇失身就唔知，不過去完日本嘅佢，個樣唔同咗就好易睇得出喇！
至於運動員出身嘅李思雅就話活動完咗，夜啲同阿叻起程去巴西拍外景，佢話好開心有呢個機會。講到之前俾網民話把聲難聽，李思雅話有練習緊，希望有改善。而阿叻講到苗僑偉同曾志偉新抱嘅親密合照，就講笑話自己冇家事，因為絕子絕孫冇新抱，所以唔識畀意見：「冇嘢嘅，志偉百毒都入晒㗎啦！」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！