香港是我家，但香港不是宜家，不是適宜居住的家。美國剛公布了一個「最健康城市」的調查，美國人認為的「健康」包括要有高爾夫球場，狗公園，緩跑徑，還要計算每個城市的吸煙率，肥胖率。
香港人看見這個指標相信會眼火爆，狗公園？人公園都唔多個。香港有不少公園都位於騎呢位，天橋底，馬路邊，心曠神怡，空氣清新；上海街公園，性教育最佳訓練場所。「阿仔唔好嘈住姐姐做生意，人地講緊價啊。」
香港人不貪心，我們沒有奢求要森林原野餵鹿放牛，我們只想有位晾衫。屋邨空地成為晾床單被鋪晾爸爸媽媽的展覽會，因為斗室無位，有露台也是握手位，隨時攞錯對家的內衣。
所以有人說，公屋居民比私樓人幸福，因為公屋可以晾萬國旗，人要透氣，衣物也要透氣。綠色，環保，悠閒，本來是一個人的正常需要，但在大城市，例如香港卻成為奢侈，只有豪宅才有翠綠園林，之前可能還要先斬掉原址的樹木。但我很討厭一種說法，就是「香港咁細，係咁㗎啦，點同外國比」？
香港細，香港人就扺死㗎咩？香港細，香港人就唔需要休息唔駛減壓唔駛放狗唔駛晾衫唔駛見太陽唔駛有生活質素。
香港咁細，咁點解我地又要求咁多名店旗艦店我地又唔會覺得唔正常？
香港細，所以香港嘅單車就活該人車爭路然後被人砵到暈。
香港細我地一樣要求曼聯應該嚟香港獻技囉。但由於香港細，所以填海一定啱，拆樓一定啱，遊行唔封路逼你沙甸魚步行又啱。
香港細，所以我們只配有兩間好有質素的免費電視台。
明明叫家是香港，但原來有十多萬人住板間房囉。
因為香港細，所以別怪香港人成日小小聲。