摩連奴離開6年之後，終於喺周一返番車路士教波。04年佢空降史丹福橋球場時寸爆，仲自封為「特別的人」，但今次返嚟就玩親民，勁口甜舌滑咁冧「車迷」，用再婚嚟形容同車仔嘅關係，又話好開心返到一間粉絲鍾意佢，同埋對佢非常重要嘅球會。
車仔喺周一宣佈委任50歲嘅摩連奴為新任領隊，雙方簽約4年，據報合約總值4,000萬鎊（約4.75億港元）。摩佬同車仔電視講：「我哋終於再喺埋一齊，對大家嚟講都係美麗時刻。我哋準備再次結婚，而且將會好快樂同成功。我可以話，我係你哋一分子。而喺我嘅足球事業，我有兩個偉大時刻，分別係喺國際米蘭同車路士，對我嚟講，車仔更加重要。」車仔會喺下周一幫佢開記者會，等佢正式會見傳媒。
呢位葡萄牙名帥繼續嘴甜：「呢個決定好容易。我問老細（阿巴莫域治）想唔想我返嚟，佢反問我想唔想返。我諗咗幾分鐘後就做出決定。我試圖抑壓自己嘅情緒，但好明顯，我真係堅開心。」被問到喺皇家馬德里成日苦口苦面，𠵱家返嚟車仔係咪開心晒，佢就咁回應：「我唔係好開心，而係堅開心。除咗之前喺度取得成功，仲因為粉絲好喜歡我；呢度啲人好了解我，我同班主及球會亦一直保持良好關係，所以我好榮幸可以返嚟。」
奪英超賠率熱至3.25倍
過去6年先後喺國米同皇馬執教嘅摩連奴仲話想長留車仔：「我已經50歲，因此自己嘅歐洲之旅亦都完咗。」摩連奴回歸之後，車路士喺13/14球季英超嘅奪標賠率亦升溫，由6倍熱至3.25倍，而主場聯賽不敗嘅賠率都好熱，只係得5倍；至於英超同英足盃「雙料冠軍」係15倍，贏歐聯就11倍。
另外，佢家陣要開始重組球隊，消息話佢睇中咗曼城前鋒迪斯高、羅馬中場迪羅斯同費倫天拿前鋒祖維迪等（見附表）。
Hit一o下，動全新
即刻去Google Play Store, 下載【蘋果動新聞】新版Android App:
http://bit.ly/appledailyupdate
自力更新方法：
1)到 Play Store
2)搜尋「Apple Daily」
3)登入蘋果動新聞App
4)按更新，即可動全新
iPhone新版App，將於7月登陸