中環食Lunch，總係人頭湧湧，食到滾水淥腳。原來中環有唔少低調小店，雖然位置隔涉，但可讓你遠離煩囂，食物可能會有意想不到驚喜。
記者：何嘉茵
攝影：潘志恆、蔡家輝
模特兒：Hillary@Unique Model
個性素食
「我哋餐廳今年踏入第八年，可以生存到𠵱家，簡直係奇蹟！」Soland老闆Charles說。難怪他這樣說，因為這間餐廳的位置極其隱蔽，入口位於巷中巷內一幢無門牌的唐樓，要行上三層樓梯先到達。甫進店，很驚訝全店滿座，餐廳播放清幽的音樂，客人可靜靜地品嚐美食，沒想過中環有這個世外桃源。「喺中環咁隱蔽嘅地方開素食店，係唔想雷聲大雨點小，捱唔住貴租執笠，寧願盤生意細水長流啲，希望帶起素食嘅潮流。」
不得不說此店很有個性，全日只提供一款主菜及餐湯，餐牌上沒有特定菜式，按當日時令蔬菜而定，客人要早一日預訂，「我哋會睇住中午Booking嚟預食材，盡量唔想浪費食物。」Charles解釋。這店提供的食物，是比素食更嚴謹的Vegan，Vegan即完全素食，連動物製品如蛋、奶、蜂蜜等都不會使用。是日主菜有糙米飯拼鮮淮山汁，內有超過八款蔬菜，油鹽糖相對下得少，只用蔬菜熬成的高湯灼熟，吃的都是蔬菜的原味。糙米飯很有口感，配上鮮淮山汁，很開胃。最吸引的是有多款健康飲料選擇，首推無蛋無奶的亞麻籽果昔，以火龍果、香蕉、紅菜頭等製成，質感很濃很稠，味道清甜，卻沒有奶昔般的飽膩感。
Soland（9473 3412）
地址：中環機利文新街6號3樓
平民心機作
在人來人往的皇后大道中，有一幢商廈全是律師樓、醫務所等，惟獨只有一間西餐廳隱身這處三年，待有心人發覺。「呢度好隱蔽，只係熟客先知，好彩隔籬舖係多年老字號嘅洋服店，經過或者等開門嘅顧客會順便嚟幫襯，算係有啲人氣。」負責人陳小姐說。雖然此店主打西餐，但也有提供台式肉燥飯、日本冷麵等多國菜式。「生意難做，尤其喺中環！」她一語道出原因。「中環多數餐廳主力做午市，所以競爭好大，要提供多種選擇畀客人先做得住。」
她首推誠意十足的意大利飯，「有好多餐廳煮意大利飯，都係先煲熟飯再淋汁，或用日本珍珠米魚目混珠，我哋用正宗嘅生炒法煮意大利飯，可以保留飯嘅乾身爽口同煙韌口感。」見師傅足足炒了20分鐘，在這快餐時代算是少見的心機之作。小記最愛是玫瑰雞翼，用玫瑰花、香茅及蒜頭醃足兩日，雞翼略帶粉紅色澤，咬落有濃濃花香味，很特別。
Podium Cafe（2524 4994）
地址：中環皇后大道中79-83號萬興大廈4樓B室
大賣神話
沒想過在中環有一處可以讓人追星兼嘆咖啡的地方，位於威靈頓街商廈內，有一間以韓國組合神話為主題的Cafe，店內貼滿他們的海報、播放着他們的歌，還有一系列以他們歌曲命名的特飲，就連餐廳名字「Eusha!Eusha!」，也是以他們第一首較為多人認識的歌曲命名。這裏的老闆林氏姊妹為神話粉絲，她們一直想開屬於自己的Cafe，「神話剛於去年重組，忽發奇想用他們作為主題Cafe，有好多粉絲專誠前來朝聖。」
此店以神話為包裝，少不免提供韓國菜式，推介較地道的韓式雜錦拌飯，另有意粉、沙律等輕食選擇。由於林氏姊妹是印尼華僑，所以店內亦提供不少印尼小食，招牌作自家薯餅，在薯茸加上黑胡椒、豬肉和少許辣椒搓勻再炸，味道微辣，內裏軟腍，建議配上由店主烘培、成本較高的瑞士咖啡，享受這片刻的韓國風情。
Eusha!Eusha! Cafe & Diner（2757 9878）
地址：中環威靈頓街97號威利大廈2樓2D室