【跑馬地】現年31歲嘅無綫花旦胡定欣同馬國明分手後，男方近日同李詩韻傳緋聞，不過，胡定欣同男友都好穩定，經常出雙入對。胡定欣套新劇《食為奴》就嚟返內地開工，有排見唔到男朋友，所以佢日前趁住停廠唔使開工，就同佢嘅筍盤男友、廣告公司老闆沈栢淳（Patt）拍拖食飯。
話題講唔完
當晚7點幾鐘見到胡定欣架福士私家車泊咗喺跑馬地嘅街邊錶位，之後就發現佢同男朋友Patt喺一間上海飯店度撐枱腳。
雖然佢哋揀咗個門口位坐，不過胡定欣好醒用背向住門口，唔留心都見唔到佢。見佢哋邊食邊講好似有講唔完嘅話題，有講有笑之餘仲不時見到胡定欣幫男朋友撥頭髮，睇落都覺好溫馨。食到一半胡定欣好似唔夠食猛睇餐牌，睇咗一輪之後，男朋友就幫佢加咗個餸，其間男朋友仲拎部手機出嚟玩，有時又畀女友睇吓，兩口子好有老夫老妻feel。食咗大概大半個鐘Patt一馬當先起身畀錢離開，胡定欣依然好姿整咁補返個妝，然後至前後腳步出飯店，返車位攞車離開。
採訪、攝影：梁繼光、吳耀輝、黃曉程
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！