英超阿仙奴7月將會展開亞洲之旅，最後兩場波將會喺日本踢；兵工廠隆重其事，搵番一班槍手嚟複製經典街機《街頭霸王》、阿Ryu出絕招波動拳打中對手一幕，宣傳日本站賽事，成班大細路玩得勁開心。
出波動拳好齊心
其實今次個idea唔係兵工廠自己諗出嚟，而係抄番今年初紅爆全球網絡嘅波動拳惡搞。呢個惡搞都唔易做，成班人要好齊，同時間一齊跳，又要有番咁上下高度，先影得好睇。阿仙奴今次搵咗華美倫、高基連、阿迪達、辛迪卡索拉同蒙利爾，去拍呢輯相。5個人都係80、90後，又點會唔識《街霸》呢啲經典game？所以佢哋一聽到職員講點影嘅時候，都好鬼有興趣。
雖然佢哋係大球星，不過玩惡搞始終都係外行人，所以拍起上嚟都要影番幾個takes先影到一張；其中阿迪達出波動拳嗰時，辛迪卡索拉「中」咗成秒先有反應，蝦碌NG要再嚟過。不過呢輯相出到嚟嘅效果，真係好鬼正；個個都飛得好靚，而且面部表情一流。周一兵工廠將輯相同花絮片放上官網，為亞洲之旅做宣傳。
「神丹」被踢迎朗尼？
阿仙奴將會喺7月22、26號，分別作客名古屋鯨魚同浦和紅鑽，到時球迷見到偶像，大可以再玩多次波動拳惡搞。不過，有「神丹」之稱嘅巴西中場丹尼遜就冇得玩啦，因為過去兩季被借返巴西聖保羅嘅佢，日前同球會達成協議終止合約，今次亞洲之旅一定見佢唔到；反而雲格認對朗尼有興趣，唔知到時會唔會見到佢齊齊去日本「出波」呢？
Hit一o下，動全新
即刻去Google Play Store, 下載【蘋果動新聞】新版Android App:
http://bit.ly/appledailyupdate
自力更新方法：
1)到 Play Store
2)搜尋「Apple Daily」
3)登入蘋果動新聞App
4)按更新，即可動全新
iPhone新版App，將於7月登陸