三色台拎到洲際國家盃同明年世界盃嘅主播權，世界盃更加部份拎出嚟免費播，對廣大市民都係好事；三色台呢排都好積極做熱身，直播德國盃決賽，又直播兩場德國訪美嘅國際賽，可惜周日德國作客美國出現「派膠」龍門外，三色台又出現報錯比分情況，是是但但作風未改。
德國3:4輸畀美國
美國足總為慶祝成立100周年，周日喺首都華盛頓搞場友誼賽對德國；德國可能一來唔想搞寸美國party，二來對住舊老闆奇連士文，都畀番幾分薄面，上半場已經輸兩粒下，以3:4輸波收場。
講起呢隊冇拜仁球員嘅德國隊，教練路維諗住試吓新人，點知就試出禍，德甲慕遜加柏21歲門將達史特根，第3次代表大國腳就出事，16分鐘接應賀維迪斯回傳，呢位國家隊排第4、第5嘅門將竟然控甩腳，回身太慢皮球已溜入網窩，美國收呢個大禮領先到2:0；達史特根犯咁大錯，真係隨時俾人笑足一世。
鍾仔澄清正確比分
或者呢個「烏龍球」太經典，負責全球直播嘅電視台都搞錯比分，左上角打出1:1比分，足足達5分鐘先改正；三色台當然有報錯分畫面出街，雖然嚴格嚟講，出錯主因唔係三色台問題，評述員鍾志光亦澄清番正確比分，不過始終畫面同現實情況不同，網民都cap晒圖寸三色台一番。
三色台拎到兩個大賽直播權，但評述員份量就唔夠收費台勁嘞；好似周日評述美國對德國，鍾志光算主導角色，都算做足功課資料齊，但李偉文、潘文迪兩位前港腳，足球知識就唔使懷疑，但始終聲線都好沉，洲際國家盃同世界盃都喺巴西搞，球迷要捱更抵夜睇波，仲要頂埋兩位嘅催眠tone，幾難搞。潘文迪噚日帶領港足操練後回應︰「場波本身都有少少沉悶，始終係佢哋最後一場（國際友誼賽）；我哋都知隊波陣容唔係路維嘅腹稿，畢竟呢場係友賽性質，佢都想睇吓啲接班人、年輕球員表現。」
三色台早前嘅宣傳，6月15日開鑼嘅洲際盃，除咗噚晚講波個三位仁兄外，仲加埋皮蛋黃同丹尼爾兩位客席講波佬，有睇過佢哋評述嘅比賽，都知佢哋又有料又搞笑，如果唔係，香港球迷都要悶住捱洲際盃。
Hit一o下，動全新
即刻去Google Play Store, 下載【蘋果動新聞】新版Android App:
http://bit.ly/appledailyupdate
自力更新方法：
1)到 Play Store
2)搜尋「Apple Daily」
3)登入蘋果動新聞App
4)按更新，即可動全新
iPhone新版App，將於7月登陸