唔夠半個月，恒指9RSI由雙頂背馳嘅短線嚴重超買，跌到去30水平，即使短線撈底機會未出現，相信呢個位先嚟短線造淡，勝算亦唔高，呢啲就係短線上落市嘅現象。
噚日用基本分析角度睇港股，應該呈上落市，如果以技術分析呢，結論又係咪一樣？先睇日線圖，恒指啱啱跌到去保歷加通道下軸22251附近，而指數一連幾日只係隨住下軸下移，一齊慢慢跌，要出現直線隊穿下軸再急跌嘅走勢，先至形成恐慌性拋售，所以，現時未見到市況有加速惡化嘅條件。
如果睇中線支持位，最大路係目前恒指周線圖保歷加通道下軸21628，隨住下軸慢慢下跌，相信稍後會跌到去接近250日線21429，形成雙重支持位。不過，𠵱家市場上太多人睇住呢個位，相反理論之下，晉佳暫時估指數未去到21600就短線反彈。
新方向快出現
上落市玩得耐，總會有個方向，睇番2009年12月至2010年8月，同埋2010年12月至2011年7月嘅上落市，前者新方向係升，後者新方向係跌，不過兩者都出現同一特徵，就係周線圖MACD線同訊號線都會跌破零水平，先至有新方向出現，而MACD線同訊號線𠵱家向下跌，去到接近零水平，換言之，新方向可能唔使等好耐就睇到。
至於要估下一浪係升市居多定係跌市居多？就要睇再長線嘅月線圖，恒指保歷加通道中軸喺21056，但睇MACD指標，MACD線有機會喺未來兩個月內跌穿訊號線。由於恒指月線圖MACD指標極少呃人，出現買入訊號就確認升市，沽售訊號就確認跌市，所以未來兩至三個月恒指如果唔能夠向上突破，阻止MACD形成沽售訊號嘅話，之後出現大跌市機會就相當高，到時真係要沽貨走佬。
又一次證明，睇圖表真係有機會睇到基本分析發現唔到嘅形勢，總括嚟講，短線上落市形勢未變，仲可能有反彈，但長線開大定開細，食粥定食粥就係睇未來兩三個月，暫時睇，長線形勢不太樂觀。
晉佳
小啟：晉佳暫代王昇一天
Hit一o下，動全新
即刻去Google Play Store, 下載【蘋果動新聞】新版Android App:
http://bit.ly/appledailyupdate
自力更新方法：
1)到 Play Store
2)搜尋「Apple Daily」
3)登入蘋果動新聞App
4)按更新，即可動全新
iPhone新版App，將於7月登陸