【台北】失婚辣媽鍾麗緹雖然已經42歲，但勝在老娘夠騷，近日發電連𠝹兩個混血型男，一箭雙鵰！大前日鍾麗緹喺台灣出席好友戴愛玲新碟發佈會，夜晚佢哋去咗食麻辣火鍋，同枱有兩位混血型男陪食，原來係台灣男子組合MIXION成員張翔然同雷小胤。
由於第二日係張翔然嘅27歲生日，飯後鍾麗緹就拉隊去張惠妹開設嘅酒吧A Light狂歡，佢哋落車後喺酒吧門口玩自拍，鍾麗緹夾喺兩位混血型男中間，好似𡃁妹仔咁興奮到擘大口，仲擺出S形甫士同雷小胤玩自拍，成班人入咗酒吧冇耐，唔夠十分鐘又出嚟殺入便利店。
交換聯絡電話
鍾麗緹彎身揀飯糰，兩男幫手攞購物籃獻殷勤，三人趁機交換聯絡電話，之後鍾麗緹遇到三位女友人，大家又熱情招呼，然後返入酒吧狂歡。事後MIXION助手話：「張翔然和雷小胤見到鍾麗緹好開心，雷小胤還以為鍾麗緹只有25歲，知道她原來已經42歲時，即刻嚇一跳。」
撰文：林妃
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！