啟德郵輪碼頭即將啟用，接船、送船以外，不如再到鄰近的九龍城搵食。由六七十年代的潮汕人聚居、到八九十年代泰國人加入，再由飛機升降聲換上郵輪的鳴笛聲，九龍城正在不斷更新、轉變。
記者：何嘉茵
攝影：陳永威、許有達
泰勢力：同心 雜貨店起家
九龍城這個小城，共有70多間泰國菜館，城南道是有名的「小泰國」。在這裏無人不識同時擁有餐廳及雜貨舖的同心老闆謝小姐，她是泰國土生土長華僑，81年隨丈夫嫁來港，「當時大陸未解放，好多男人都娶泰國女人，加上自從第一間泰國菜館黃珍珍喺度開咗後，吸引咗唔少泰菜館入城。」
泰國人聚居九龍城，還有一個重要原因，「九龍城近舊機場，有唔少泰國人回鄉探親後順便走水貨，一落機便去城南道擺地攤，賣泰國日用品，當時成條街都係，好多泰國人專登過嚟買。」不過，九八年機場搬離，九龍城便變成死城，「機場搬走，加上金融風暴，好多舖頭一係執笠，一係搬走，我哋好好彩，唔少熟客會專登入城幫襯，業主又主動減租，算係勉強為到皮。」
對九龍城另一打擊，相信是03年沙士，好多食肆都受影響，惟獨對泰菜館的影響很微，同心此時擴充開分店，便是一大例證。「泰國人比香港人樂天，佢哋會繼續出街食飯，生活如常，所以生意額唔係跌好多。」但她面對近來城中轉變，卻不感樂觀，「呢度加租加得好厲害，我哋啱啱就加咗五成，啟德碼頭距離呢度唔算近，啲人未必會專登過嚟搵食，好難估計人流會多咗幾多。」
同心泰國菜館（2716 4588）
地址：打鼓嶺道11-13號地下
潮州派：合成 糖水啖啖渣
當甜品店在九龍城開到成行成市，有蓮子大王之稱的「合成」，已進駐了深水埗16年，可說是城中首批糖水店。合成第三代傳人方壯權說：「最初搬嚟，全個九龍城得兩間糖水舖，點似𠵱家每條街有六七間咁多，以前呢度最多係潮州人同泰國人，自然通街都係潮州菜館同泰國菜館。」他爺爺在1955年於深水埗開潮州糖水店，到他接手後，97年便決定入城開分店。「自己係潮州人，貪呢度多『架忌冷』，諗住同聲同氣，會有唔少同鄉嚟幫襯，估唔到九龍城嘅潮州人好少喺呢度食嘢。」
合成搬入城，正值九七蜜月期，一年後機場搬走，人流直插，短時間內嘗盡天堂與地獄，「當時好多舖頭執得就執，有舖無人租，我哋客人以外來客多，機場搬走後，更方便客人泊車，算係因禍得福。」經過機場遷徙後的死寂，合成現是人氣糖水舖，不過，以前潮州舖佈滿每條街的情況已不復見，「近幾年舖租加得好厲害，唔少潮州菜館執笠，潮州勢力比以前已經小咗，反而泰國菜館就越嚟越多，希望新碼頭開咗可以增加人流。」
合成專做潮式糖水，坊間少見，「潮州糖水一定有白果、蓮子，像潮州粥，渣特別多，強調咬口感，食完有紮實飽肚感，唔似廣東糖水煮到糊狀。」這兒的糖水大多加入福州上等蓮子，「蓮子要親手洗淨去衣，先用大火煮滾，再加冰糖以小火熬足六七個鐘，直到蓮子變得鬆化，花費的工夫絕對不少。」
潮州合成甜品（2383 3026）
地址：龍崗道9號地下
潮州派：黃明記 自家打潮丸
這間隱身城中多年的潮州麵館，1970年由東頭邨街邊檔做起，於72年搬往現址，是首批入城的潮州老店。憑着一碗潮州墨魚丸麵，黃明記就這樣走過四十多年，今日已由子女接手。負責人黃小姐回憶道，「啟德一搬走，生意跌了起碼兩成，好彩係自己舖重做得住。我細細個就要幫手煮麵，以前係路邊檔日曬雨淋，後來搬入舖，爸爸話幾辛苦都要供個舖位返嚟，上一輩嘅潮州人真係好捱得。」
此店的豬肉丸及墨魚丸是鎮店之寶，豬肉丸每日用新鮮本地豬打成，向有50年交情的肉檔取貨，貪貨源夠穩定，而墨魚丸則只用墨魚身來打，膠質重，還加入芹菜、馬蹄和炸過的乾葱頭，咬落非常香口。至於湯底除有豬骨外，還加入大地魚煲成，真材實料。
黃明記粥粉麵家（2716 2929）
地址：啟德道80號地下
城中還有……
1.貴嶼和記隆
於1948年創立，多年堅持用古法製造潮式糕餅，以花生糖最受歡迎，香脆酥軟。每年的中秋節，潮州傳統月餅還成為全年焦點，除芋茸餡外還有綠豆餡，不少客人老遠也跑來訂月餅。
貴嶼和記隆（2382 1673）
地址：城南道59號地下
2.義香荳腐食品
已有五十年歷史，皆因招牌豆腐花和豆漿以石磨磨豆和明火烹煮，帶微微焦香味。此店兼賣碗仔翅、涼粉等小食，推介煎釀三寶，為自家手打鯪魚肉，彈牙夠天然。
義香荳腐食品（2382 5006）
地址：衙前塱道74號地下
3.盛記海鮮
來到侯王道，自然會被這間海鮮店吸引，店子雖小，海鮮卻一應俱全，如紅海斑、東星斑、加拿大象拔蚌等，色彩繽紛非常生猛。店主是魚類批發出身，在行內打滾廿多年，入的海產都是頭批靚貨，有不少名人捧場客。
盛記海鮮（2382 8180）
地址：衙前圍道110號G（侯王道入）
4.清真牛肉館
鎮店之寶牛肉餅，外層香脆，咬下去肉汁滿溢，曾創下日賣千個的紀錄。其他小菜亦出色，其中以羊肉最為聞名，咖喱羊腩是人氣之選，香濃但不羶，用以佐飯一流。
清真牛肉館（2382 2822）
地址：龍崗道1號