鄭秀文（Sammi）之前同劉德華為新戲《盲探》去咗康城影展宣傳，跟住返港冇耐就有網友影到Sammi又同男朋友許志安去日本行街，果然好識得將工作同休息時間分開，充完電後大家又可以再次投入應付工作喇。其中Sammi同華仔套《盲探》安排咗下月4號上映，所以嚟緊呢段時間佢哋都有唔少宣傳工作。
「純屬燈光效果」
噚日Sammi喺微博貼咗一張佢拍《盲》片嘅相，哇，真係令人眼前一亮，點解？因為相中嘅Sammi心口居然有兩至三吋長嘅事業線，大家冇睇錯，馮仁昭係寫事業線，着住黑色低胸背心嘅Sammi心口真係有深溝，唔通佢做咗乜嘢手腳？不過Sammi即刻留言解釋：「毫無疑問，純屬燈光效果。你們懂我的意思！」擺明就係講心口嗰條長長嘅事業線。不過導演杜琪峯今次真係為Sammi塑造一個好唔同嘅角色，有唔少發揮機會，真係想將Sammi嘅事業再推向高峯。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！