恒指以至一批大型股份近排都死吓死吓，原因係主要國家缺乏推動經濟加快增長嘅板斧。要解開困局有兩個轉機，一係中國下半年推出真正能夠刺激經濟嘅好橋；二係透過股市大跌，迫使各國元首使出非常手段，令股市V形反彈。至於邊個可能性大啲？晉佳偏向後者，因為有壓力元首先肯做嘢，而中央上半年其實已經出咗唔少招，但就係一啲長遠改善經濟結構嘅措施，短時間難見成效，中央亦未必會一下子改變放長線嘅心態，憧憬下半年有大政策出台嘅投資者可能失望。
喺市場對經濟前景悲觀時，港股就唔係太跌得落，即使冇好消息，恒指都識得反彈，全因估值夠平，市賬率得1.41倍，處於過去廿年1至3.5倍嘅低端，屬於熊市估值，足夠反映好多不利因素，上落市就咁形成。
突破2.25元至跟
不過中國咁大，整體經濟唔得，唔代表所有行業都衰，喺投資者信心未死得晒之下，就孕育一批有概念嘅二三線股炒上，一嚟大戶可以繼續搵錢，二嚟有股升就可以引一批邊緣散戶落叠，令大戶可以喺佢哋身上贏波幅。
講咗咁耐都係圍繞近期港股局勢，但係明白局勢先至明白點樣操盤去拆招。大家要記住𠵱家唔係贏大錢嘅時候，而係慢慢累積本錢，係考耐性、定力嘅時候，如果有耐心等機會買入有概念嘅二三線股，能夠克服波幅坐穩，拉勻照計有錢贏，最緊要係做到坐和望贏，等下次大升浪來臨。
廢話講完，可以講吓儀征化纖（1033）同上海石化（338），上周四晚，兩間公司發公告話中石化籌劃緊兩隻股嘅股改方案。中石化股改，真係等咗三年又三年，但係咁重大嘅消息，都只係刺激儀征股價上周五升18.5%，上石化升8%就更加嘥氣。
究竟乜嘢葫蘆賣乜嘢藥，真係估佢唔到，但係遲嚟嘅股改，照計唔止升咁少，如果見到儀征突破上周五高位2.25元，先至有運行，升唔起就繼續觀望住先。
晉佳
本欄逢周一、三及五刊出
Hit一o下，動全新
即刻去Google Play Store, 下載【蘋果動新聞】新版Android App:
http://bit.ly/appledailyupdate
自力更新方法：
1)到 Play Store
2)搜尋「Apple Daily」
3)登入蘋果動新聞App
4)按更新，即可動全新
iPhone新版App，將於7月登陸