朝見口晚見面的同事，茶餘飯後的話題總是古靈精怪的講不完，正所謂怪事日日有，今日特別多。但偶爾遇着好久不見的老朋友，卻是千頭萬緒不知如何說起，「好耐冇見啦，點呀你近排？」「冇呀，都係咁啦，你呢？」唔通咁耐無見，一見面我就話你知我轉咗工、搬咗屋、換咗畫、賣咗車、生咗骨刺、冇乜跑步咩……過去一季大事小事一大籮，要稍為整合一下主題的話，就是放手吧。
看着球圈一個又一個熟悉的面孔陸續淡出，過去這幾個月恐怕也為球迷們帶來了不少感傷，回憶總是美好的，一個時代結束了，下一個世代又會如何呢？歡迎大家加入懷舊俱樂部，終於90後的小伙子也學會傷春悲秋，正如我們告別80年代時，才明白爸媽們為甚麼開口埋口都是60年代一樣。
也替明年才開始睇波的朋友有點可惜，日後他們只會從朋友口中聽說費Sir是如何的惡死，只可從YouTube中睇番碧咸的射罰球是如何的chok，以及在TVB的世界盃前奏中才目睹奧雲仔是如何的快如閃電……。
曼聯換帥對紅魔粉絲是打擊，但對其他列強卻是難得的好機會，當我們都討厭壟斷獨霸的局面時，英超可能率先進入百家爭鳴的新時代，莫耶斯是一個未受大球會洗禮的藍領領隊，適應期的兩、三年內，摩連奴回歸的車路士隨時就補上七國霸主之位，所謂離開是為了回來，明年英超的鎂光燈都會集中在葡萄牙人身上，尤其是考慮到雲格的老油條走勢， 比歷連尼的初來埗到，羅渣士和莫耶斯的資歷有限，成績未可料，曝光程度就肯定係摩帥贏晒。唯一手持外卡可以與佢爭一日之長短就只有同鄉C朗，是轉或不轉，是情的摩連奴還是義的紅魔鬼，都會改寫英超新時代的劇本。
睇波其實係睇人，人的故事又確實會互相感染，在病毒四圍飛的年頭，尤幸本地還有不少令人動容的故事，九優巴士司機的一個選擇，讓我們在死谷爛谷小朋友「咪」書的同時，也多了一個角度去想像未來。上周看台灣雜誌發現一個題目叫做「發明你的工作」，說的是新一代的事業趨勢，已經不是傳統那一套。發明兩字或許有點沉重，但能先放開雙手，放低固有價值，可能就是改變的第一步。我要放低手上的筆了，新時代再見！
keyman
now TV主持
mailto:[email protected]