中怡精細化工（2341）點秤都超抵搞，係翻一番之材。中怡主打精細化工，下家包括醫藥、保健及香薰等民生用品。咁睇，呢類下游產品既唔受經濟環境影響，加埋集團本身又提升到毛利較高嘅產品銷售，所以，喺上年都算係惡劣環境下，集團全年純利都keep到8%增長，到1.3億銀人仔，家陣PE得5倍。嘩，仲想佢點？又隨住今年環球經濟一定返落嚟，加埋中怡擴大下家產業範圍，今年業績仲有睇頭。係咁意計數，集團2013年度純利增長20%，到1.5億銀人仔，預期PE得番4.8倍。再講，中怡家陣PB得0.5倍，近磅股PB已經喺一倍水位，中怡又係平過人。真係唔好計多，中怡現價翻一番到3.7元計，PB先啱啱好追上同業，而預期PE都係得9.6倍多少少。
追炒亨泰翻半番
「一周兩件」上星期副選中國天化工（362），股價逆市最多升近40%，好靚仔，要追炒亨泰（197）。亨泰揸咗中國天化工近3.4億股，相信呢手貨係上年中國天化工供股時所得，供股價只係0.15元。亨泰呢手貨，大大增值1.4倍。又亨泰淨現金高達6億銀，超級現金牛。呢轉博亨泰翻半番到0.28元，未有耐上到NAV 0.65元。
錢雋