湖人前鋒世界和平一向多搞作，最近佢仲做埋作家，寫咗一本兒童讀物，鼓勵小朋友睇嘢正面啲！佢日前上咗ESPN駐洛杉磯嘅電台宣傳新書，仲即場讀咗其中一兩個故仔㖭呀！
世界和平本新書叫《Metta's Bedtime Stories》，售價只係12.95美元（約100港元），顧名思義即係畀家長喺仔女臨瞓前，讀畀小朋友聽嘅故事。書入面有一系列嘅故仔，同英超車路士中場林柏特就出嗰本書好似，專門為4至10歲小朋友而寫，例如「黑咪炆我怕怕」同「張床有啲啡色嘢」。呢啲故仔都係小朋友日常嘅事，平哥今次就係想用埋身嘅手法，鼓勵小朋友要正面啲睇嘢，咁咪唔會怕黑同喺張床瀨咗嘢俾媽咪話囉。
平哥近日上咗ESPN LA電台做節目，講起本書嗰時，仲即場讀咗個故仔畀主持人同聽眾聽。前者將做節目時個「認真的背影」，放上twitter向球迷報告自己行蹤。而ESPN LA都好幫得手，影低《Metta's Bedtime Stories》嘅封面，放上twitter幫世界和平做宣傳。
「殺人王」場外係才子
呢位湖人前鋒之前拍過戲，上過YouTube節目，早前又上埋電視台，邊做瑜伽邊報天氣，𠵱家仲要出埋書。世界和平雖然係「殺人王」，但係喺場外絕對係一個才子！