提起恒地主席（012）李兆基「四叔」，通常都聯想起兒子李家誠，千億新抱徐子淇，「3D界喬布斯」李應樵（Herbert），你又認識嗎？Herbert是四叔姪兒，沒有富二代的高傲架子，每當談到其一手建立的3D王國，更是滔滔不絕，修讀結構工程師的他，更坦言「應一早讀電腦Master，再自己去創業，可能快啲做喬布斯！」
記者：李可美
攝影：黃偉傑、部份相片由被訪者提供
李應樵父親李兆麟，是四叔的三哥，同樣搞地產起家，修讀結構工程的Herbert強調，家人從來沒有強迫其修讀任何科目，「以前讀起樓，因為費事煩，屋企係地產世家，要成功讀呢樣就最易，如果再揀會讀電腦。」
含住金鎖匙出世，又是地產世家後代，炒樓賺快錢，簡直是易如反掌。不過，這位「3D界喬布斯」反問，「炒樓好被動，賺到啲錢又點？有十層樓又住得晒咩？就算唔憂又有乜意義？」連串理所當然的問題，記者只有笑而不答。
反對炒樓 撐四叔捐農地
香港樓價炒到癲，他更不諱言，「樓唔應該係一個投資工具，政府唔應該令人覺得投資地產係一個行業。政府可以推好多樓出來控制個市，不過唔知點解佢唔做。」
四叔提出捐農地、興建上車盤大計，作為侄兒的Herbert亦開腔支持，「梗係好啦！」。更認為填海就是增加土地的最好方法，現任政府太多制肘，「呢樣又話唔得，個樣又話唔得，我都唔知點做呀。」
他放棄地產，成立萬科數碼，勇闖3D市場，他笑言，「我爸爸媽媽其實唔係太知我做緊乜嘢，只知我做緊電視機，叫我搞好啲，做好啲品質，控制吓，佢哋有去無錫（寫字樓）睇過，話得喎！」
做父母當然支持仔女，就正如Herbert一提起五個月大的囝囝就興奮地分享，「三、四個月手仔識Open、Close。細個嗰陣時，喺肚入面就胎教，聽音樂、讀書、溝通，上過胎教堂。」看得出Herbert十分疼愛「小喬布斯」，一心想栽培他，「（囝囝）鍾意新嘢，鍾意周圍望來望去，四個幾月跟你唱歌，每個月同佢影一輯相。」近幾年忙於事業，所以見面機會較少，不過會否想囝囝做接班人？「無乜所謂，自由發展啦。」
瞄準富豪 力拓裸眼電視
【雄心壯志】
Herbert出身地產世家，試過炒豪宅賺大錢，亦做過珠寶設計，但發覺無挑戰性。幾年前，毅然轉戰3D市場，更考獲科技管理碩士及知識管理博士，決心創造全球唯一一間公司，提供設計及製作內容（將影片2D轉3D）、生產顯示屏等一條龍服務。要建立王國，充足銀彈是不可缺少，「燒咗好多錢㗎嘞，每年最少投放幾百萬做R&D（研發及生產）。」
Herbert去年推出全球最大82吋裸眼3D顯示屏，即是不用戴3D眼鏡，都可以看到立體影像，主攻企業客戶市場。他興致勃勃地說：「教育界係一個大Market，（裸眼3D）可以做到心臟運作、DNA結構及建築圖等。很多大商場、澳門賭場、教育機構都有興趣。」
他更決定將裸眼3D帶入屋——富豪間屋，「不會普遍到平民都用啦，電視機睇幾年，就算貴多一萬蚊，日日睇，有錢人唔會介意。」他透露，將在9、10月份推出65吋超高清電視，明年就推超高清裸眼3D電視。記者追問會否轉贈給四叔，「好哦，佢有興趣，我送部畀佢無問題，不過佢真係睇先好喎。」
要建立3D王國，他選擇在無錫及深圳開設研發基地，「無錫人工平，請人易，仲可以平租過萬呎寫字樓，35蚊人民幣一米，（當地政府）補貼30蚊，即係5蚊租。」他更批評，香港人工貴三倍，工作態度較差，目前在港員工約30人，計劃在無錫增聘人手至100人，「好多地方政府開設優惠條件，吸引我在當地落腳。」
李應樵（Herbert）小檔案
職 銜：萬科數碼集團行政總裁
背 景：父親李兆麟是前上市公司兆安地產主席，亦是恒地（012）主席李兆基「四叔」的三哥
家 庭：已婚，育有約5個月大的兒子
學 歷：加拿大英屬哥倫比亞大學應用科學學士、香港科技大學科技管理學碩士、 香港理工大學工程學博士
事 業：畢業後加入父親旗下兆安地產打理生意近20年，其後曾成立珠寶設計公司、開設科技公司，在2005年組成萬科數碼集團，於2009年成立萬科數碼有限公司，創造3D王國。
