【台灣澎湖、西門町】台灣藝人柯震東同蕭亞軒（Elva）呢段姊弟情開始咗一年發展穩定，早前Elva以家人身份同男朋友一家一行十人返澎湖老家參加婚禮兼見家長，之後仲留喺當地一個星期度假。佢哋度假節目豐富，除咗租船出海去睇著名嘅兩個心形石雙心石滬呢個戀人必遊景點外，夜晚又去咗參加花火節睇煙花，非常溫馨。
巡兩舖掃玩具
柯震東事後被問起件事，佢大方承認話確有其事：「澎湖是我老家，今趟是表哥結婚指定要我捧場。」Elva方面亦冇否認，但就好低調。
大前日Elva去咗上海幫餐廳做開幕嘉賓，柯震東表現得好乖，做完嘢就搭保母車同女助理去到台北西門町一間樓上玩具店睇玩具，逗留20分鐘左右都未搵到心頭好。唔死心嘅柯震東再坐車轉咗去另一檔玩具舖，今次終於買咗兩盒價值千多元新台幣嘅日本海賊王公仔。至於佢老竇同日就同一位年約30幾歲嘅長髮女郎約會踩單車，柯爸爸解釋話呢位係女車友，之後就返咗入自己間時裝店冇出嚟。
撰文：李森
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！