我喜歡數人頭，年年數，年年數唔清，數到眼濕濕。人多啊。
亦因為，警方年年出蠱惑，試過叫人繞過泳池，沿狹窄樓梯緩慢上落，非常高危，但每個去六四的市民老老嫩嫩都平安達陣。今年曾偉雄會出什麼絕殺陰招呢？我不想拭目以待，實行踩場領教，最乾脆。
再加上，這天收到反對佔中者在地鐵口派傳單，又再翻炒雷鼎鳴指佔中一天，全港損失十六億的觀點。佔維園又值幾多錢？佔園一年一次，已經二十四年，又點計？稅局會不會向佔園者追討霸佔政府場地費用？拒交欠款，罪名肯定嚴重過貪湯！想到這種隨時成為國際笑話的蠢事，極有機會在梁凸任內發生，我就超爽。
然而，最潮的原因是，我愛國！對比湯顯明，唔使審，全港市民都是愛國的！
更深層次的原因，是每年那片燭海，深深讓人感動。烏煙瘴氣、壽頭當權的香港，走到六月，就只這麼一天，奇跡地，發光、美麗。