有上海姑爺之稱嘅瑞房（272）主席羅康瑞前日先自插，話舊年業績唔好，搞到要佢老人家出山拯救公司，仲話會搵個新CEO睇住打算分拆上市嘅中國新天地，隔咗一日，瑞房就宣佈委任同系瑞安建業（983）CEO黃勤道，做中國新天地CEO。
任中國新天地CEO
黃勤道話，佢7月先履新，家陣唔方便講太多嘢，只可以話呢個由老闆親自指定嘅任務，非常具有挑戰性，以後點搞，等佢老哥坐暖個位先再講。老闆直接落柯打，壓力有幾大可想而知，仲要係羅康瑞啱啱先至誓神劈願話要搞好新天地，嗰頭就搵黃勤道做話事人，壓力真係大。聽聞，雖然新天地今年上市機會微，但都唔係企喺度唔做嘢，成棚人整靚緊個資產組合，等時機一到即刻啟動上市大計。