德甲多蒙特前鋒羅拔利雲度夫斯基，雖然去向未明，但係睇嚟好快就會同王老五身份講再見；佢日前被德國《圖片報》爆料，下個月就會喺波蘭華沙同空手道選手女友安娜結婚。
羅拔仔同25歲嘅安娜今年先訂婚，照道理冇理由咁快就拉埋天窗。不過，《圖片報》喺周三就話佢兩個將會喺6月15日，返到波蘭首都華沙完婚。雖然香港球迷可能未必識得羅拔仔未婚妻係邊個，但係其實佢喺波蘭名堂響噹噹！安娜原來係波蘭空手道高手，喺國內錦標賽入過三甲，09年世界空手道錦標賽得過銅牌；武功咁厲害，羅拔仔將來會唔會怕俾未來羅拔嫂打？
收蛋糕晒幸福
咁又唔使驚，羅拔嫂作為練武之人，其實都係義氣仔女；當未婚夫早前喺倫敦踢歐聯決賽輸波之後，佢陪羅拔仔出席球隊喺倫敦舉行嘅賽後派對，仲同佢跳舞散心到深夜！唔單止咁，日前羅拔利雲度夫斯基同朋友開party收到個蛋糕，將大合照同蛋糕切成一張組圖放上網。只見安娜喺羅拔仔身邊，成個小鳥伊人咁，比賽場上嘅殺氣一啲都冇；除咗要讚羅拔嫂武功之高已經去到深藏不露嘅地步之餘，仲好識大體，畀羅拔仔做晒主角。
呢啲對自己咁好嘅好女仔，真係去邊度搵？所以真係希望羅拔仔要好好珍惜眼前人，無論將來轉投曼聯抑或拜仁慕尼黑，定係留喺多蒙為教練高路普打江山都好，都要錫晒安娜呀！