【銅鑼灣怡和街】現年25歲嘅樂隊Mr.鼓手杜志烜（Tom），同22歲陽光妹何思諺（Leanne）前年奉子成婚，兩人嘅囝囝已經一歲大，佢哋咁年輕就為人父母，面對嘅問題特別多，前日下晝4點幾，兩公婆就喺銅鑼灣街頭上演一幕各行各路㖭！
最初Tom兩公婆好哋哋拖手行街，身為小女人嘅Leanne除咗攞住自己嘅肩袋外，仲幫老公Tom孭埋大背囊，相反老公Tom就兩手空空，佢哋朝住皇室堡方向邊行邊傾，突然間Leanne好大聲同老公講：「唔好咁操勞！」Tom即刻黑面發老脾，仲甩開老婆隻手㖭。
之後佢哋行到怡和街，Tom嬲爆爆問老婆攞番自己個背囊，兩人一個向左走一個向右走，Tom行去時代廣場撳錢後落咗港鐵站，Leanne就行咗去百德新街入港鐵，但轉頭佢又上番地面，企喺渣甸坊打咗十分鐘sms，然後再去便利店增值，最後搭巴士走人。
Leanne：已經習慣
Leanne同老公鬧完交後，噚日凌晨喺微博留言：「其實我今天心情很複雜，因為我今天遇到很多事情，很多奇怪的事情。嗯，我很感謝我有兩個很痛錫我的朋友，這兩個人怕我難受傷心，所以想盡辦法想藉口不想我傷心，真的，真的，沒關係喇，我已經習慣了。」似乎佢同Tom唔係第一次嗌交，希望兩公婆床頭打交床尾和啦。
採訪、攝影：梁繼光
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！