無論感情上，又或是商場上，總難逃「分手」搲爛塊面的難堪場面。近日蘋果和富士康（2038）就出「奇招」間接同市場講，大家都有第二春喇！噚日富士康證實鴻海與Mozilla合作，下周簽約推出新產品，同一時間《華爾街日報》報道，蘋果將代工裝配工作移向另一間台灣企業和碩聯合科技，像安排好的劇情似的。
究竟邊個花心先還有待考究，不過出軌總有徵兆。曾經蘋果和富士康可以話是模範情侶，蘋果有創意有外型，賢內助富士康交貨快靚正，業內可謂無可匹敵。就算蘋果患上腦閉塞，外型變得千篇一律，富士康都死等求一鋪翻身，不過股價由25蚊跌到𠵱家，經歷幾年載浮載沉，就不期然會問專一係咪唔使食飯？
蘋果或者明白王者地位俱往矣，眼見富士康工人連番出事形象受累，人工太貴又未必養得起，最終兩者接受花心有理。市場亦用股價去證明，富士康做啱咗決定，噚日勁升7%，圖表前日已現頭肩底，現時52周新高都未破，升浪蓄勢待發！
Samantha
本欄逢周三、五刊出