黃德斌和梁烈唯最近分別奉命到撒哈拉沙漠和北極拍攝無綫節目《極地狂奔》，極地過後，兩人有不少體驗，德斌說：「唔好成日埋怨個天，上天已經安排得好好，只係我哋不知不覺間破壞。」唯唯也說：「好難得有呢個體驗，對人處事都硬淨咗。」看來兩人從極地中頓悟了人生。
撰文：何慧斯
從簽下「生死狀」的一刻，黃德斌和梁烈唯隨即回歸大自然，體驗人類生活最原始的一面，遠赴撒哈拉沙漠的德斌先進行七天一百公里的馬拉松賽事，他說：「喺出發已經睇晒以往參賽者啲片段，已經預咗呢次係好自虐嘅運動，不過當你去到呢啲地方，體驗咗幾日，真正感受到知道乜嘢叫刻苦。」他續說：「我哋成個行程好似游牧民族嘅生活，基本上每日都唔同地方瞓，瞓醒又執齊背囊跑去下一個point，每日用水只有兩公升，只係夠飲而唔夠沖涼，日同夜溫差分別好大，過程係艱辛嘅體驗。」
德斌：唔好成日怨天
其後德斌又到訪游牧民族，又有一番新體會，他說：「喺游牧民族身上，體驗到乜嘢叫順應天命，佢哋對生活好積極，唔會因為生活環境惡劣而怨天尤人，好識得點樣利用大自然嘅資源生活。」他又說：「今次體會到人喺大自然嗰種渺小，做人千祈唔可以咁自大，唔好成日埋怨個天，啲人成日話拍嘢好辛苦，做嘢有幾辛苦，事實上上天已經安排得好好，只係我哋不知不覺間破壞。」
至於梁烈唯的北極之旅，正是他口中最接近死亡的一次，唯唯說：「喺嗰個環境，其實死係好容易，只要一下整親郁唔到，冇人救你，喺嗰度凍到暈咗，已經可以死。出發前啲人同我講話好容易凍傷，耳仔凍到好易搣落嚟，我仲話黐線，邊有咁誇張，但原來真係好容易。」唯唯在零下30度跑馬拉松，因為體力不支，一度跑完第八圈後宣佈放棄，他說：「我諗嗰刻我崩潰咗，嗰啲跑開馬拉松嘅人話呢啲狀態係撞牆，係去到極限臨界點，我同監製講話唔繼續，可能我跑到第八個圈嗰陣，見到個鼻開始變色，面又結晒冰，手指腳趾由好凍好痛變到冇晒知覺，嗰陣咪同自己講，唔可以死㗎，我仲要返去見我屋企人同結婚。」
梁烈唯：做人硬淨咗
唯唯續說：「直到食咗熱嘢，體溫開始回升後，意志返番嚟，覺得我應該要完成。我話怕一個人跑，死咗冇人知，佢哋咪決定陪我一齊跑，如果冇咗佢哋，我諗完成唔到。」經歷過後，唯唯感受良多：「我冇後悔，仲覺得對人處事硬淨咗，唔好未做就話自己唔得，成功同失敗只係一念之差。」
此外，黃德斌和梁烈唯昨在九龍灣出席《極地狂奔》記者會，德斌因鄧萃雯轟《金枝慾孽貳》，似對她有微言，提到雯女近日態度軟化在微博為《金》劇宣傳，他說：「個劇就嚟完都會做呢啲嘢。」他稱未知有否結局飯局，若見到雯女不會尷尬。唯唯就謂從北極返港後，女友逼他結婚，但未定日子。
服裝：IZZUE Collection（梁烈唯）
髮型：KEL of HH Salon（梁烈唯）
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！