社聯行政總裁方敏生做咗12年，向來係社福界大姐大，星期一佢突然以私人理由辭職，年底離任。社聯主席陳智思就大呼頭痕，話方敏生半年前已同佢提過想唔撈，主要係因為之前太忙，趁住老公就快退休，想陪吓老公，一齊過番啲家庭生活，兼夾要唞吓喎。陳智思大嘆好難搵人接棒，事關既有江湖地位，同社福機構關係好，仲要願意做backup，唔爭鎂光燈嘅人買少見少。
社會福利界立法會議員張國柱就話，之前從未聽聞方敏生有意退下火線，聽到消息都好愕然。至於由邊位接棒，佢心目中有兩三個人選，但擔心見光死，唔肯露口風住。佢話社福界絕對有人可以勝任社聯CEO，但肯唔肯放低手頭工作轉職就係另一回事，加上社聯近年畀人話係熱廚房，想搵到人都唔係咁易。