學劉華喺《賭俠1999》話齋：「咪以為蠟咗頭就贏到幾千萬先得㗎。」英格蘭以為件衫搞到好似德國咁，就可以好似對方咁勁，但前晚場友賽咪一樣贏唔到，要靠林伯入波先逼和來訪嘅愛爾蘭1:1；反而真嗰隊德國半力出擊，都輕鬆喺美國大勝厄瓜多爾4:2。假的真不了！
英軍主場僅和愛爾蘭
三獅周三喺溫布萊，以全新波衫同愛爾蘭踢友賽；佢哋件衫係白底配海軍藍圓領，加埋條海軍藍短褲，望落去同66年或74年嘅西德冇分別。呢場波英軍雖然冇謝拉特及韋舒亞，但正選仲有赫特、艾殊利高爾（A高）、林柏特、禾確特同朗尼，實力唔差；其中第102次上陣嘅隊長A高，賽前仲獲頒發金喼帽。不過佢哋就踢唔出水準，開賽13分鐘就俾愛爾蘭前鋒沙恩朗入波而落後。好彩林伯喺23分鐘入佢嘅第29個國際賽入波，佢哋先至唔使輸，逼和1:1完場。
名宿連尼加賽後狂插英格蘭，話佢哋越踢越退步，進入咗「黑暗期」：「英格蘭喺球場上全無深度。如果對巴西都係咁，肯定衰硬。」你有你鬧，但領隊鶴臣一於少理，仲寸到話滿意演出。不過，佢哋今場有史杜列治喺33分鐘因足踝受傷打柴，另一前鋒韋碧克亦有傷，兵源短缺，令到鶴臣喺下周日作客對巴西場友賽，可能得番16個球員用。頭痕喇！
正牌德國王子威水
假德國唔掂，真嗰隊就示範乜嘢叫強隊。前日德國喺美國友賽厄瓜多爾，雖然冇咗班拜仁、多蒙特同皇馬兵，但半力都夠殺；佢哋憑普多斯基同拿斯賓達各入兩粒，其中王子先開紀錄一球更加快到9.1秒就入咗，最後輕鬆贏4:2完場。賽前傳出王子同德軍總經理比亞荷夫不和，家陣佢攞晒彩，睇嚟比亞荷夫都要做鵪鶉。