就算冇本土派挑機、就算冇「愛國愛民」口號，支聯會嘅六四燭光集會，近年都有一個好容易俾人攻擊嘅死穴，呢個令唔少悼念六四人士「生厭」嘅環節，就係支聯會副主席「狗哥」蔡耀昌擔大旗嘅致悼辭時刻。喺政壇歷盡起跌嘅狗哥，滄桑聲線非常獨特，但佢每年致悼辭時，傷心欲絕、「哭哭啼啼」嘅獨門「蔡耀腔」，成為集會最趕客嘅一環。
今年六四，支聯會一定堅持落去，仲有一樣嘢會戰鬥到底，就係狗哥上台致悼辭呢一環。狗哥話，其實佢都有留意到，唔少網民對佢致悼辭嘅語氣好有意見，佢亦都知道，自己嘅表達方式，有需要改進嘅地方，呢方面嘅問題，佢一直都有好好思考，睇睇可以點改善喎。
請教義工 改善語氣
為咗唔想令參加燭光集會嘅市民受更多苦，狗哥話，今年請教過一啲有做大會司儀經驗嘅支聯會義工，由佢哋教路，睇吓可唔可以改善自己發言嘅語氣。佢話之前其實並非造作，只不過每到六四，諗起當年嘅場面，好自然就真情流露，悲從中來。但有義工教路同佢講，其實喺燭光集會上，周圍個場景、氣氛本身經已夠傷心，狗哥唔需要太過投入個人感受，大家都會覺得足夠。
究竟，狗哥係由幾時開始喺燭光集會致悼辭呢？大約係09年嘅時候，六四20周年，佢開始接棒；之前嘅悼辭，就由司徒華所讀。
mailto:[email protected]
六四24年，我們不想記起，但未敢忘記。
蘋果六四專頁： http://6471.appledaily.com/