投資市場瞬息萬變，日股噚日怒插700幾點，恒指亦一度跌近300點，滿以為上演大屠殺，豈料日股收市後，港股隨即翻生，仲一度倒升，埋單只跌70點。又好似今季<300萬爽組合>咁，梁心欣本月一直大幅落後主車群，竟然可以喺呢幾日咁chok嘅市況發力，回報已超越穩打穩紥嘅沈大師，戰意高昂值得一讚。
iBond下周公開發售，據報幾大證券商已有逾2萬人搶先登記，其中耀才證券（1428）有逾5,000人報名，由於該行推出100%孖展優惠，加上有回購保證，預計有望藉今次iBond熱潮大舉吸客。
耀才早前已發盈喜，預計截至今年3月底止，全年賺9,200萬元，按年增長51.8%，市盈率將降至9.5倍，較同業英皇證券（717）折讓近四成。睇圖表，耀才自年初急升一輪後，股價已橫行近五個月，10日、20日及50日線滙聚，具備突破條件，只欠爆發催化劑，相信放榜及iBond熱潮可為其給力，現價0.85元入場，值博率極高。
唐牛