「電訊系」馬主張敬石兄弟旗下電訊首科（8145）噚日掛牌，配售價1元，一開波爆上3.7元，之後迅速回落，收報1.42元，認真經典。話明係大馬主，喺上市儀式上都係講馬，張敬石竟然插番自己隻馬，話「電訊特首」唔掂。
翻查紀錄，張敬石以前都有一隻「電訊特首」，1997/98至2001/02年幾個馬季都有跑，成績普通，但係都拉過五次頭馬；反觀呢隻新嘅「電訊特首」今季跑過幾場未贏過，難怪馬主都話佢唔掂。
查實張氏兄弟有四隻馬跑緊，分別係電訊太子、電訊至尊、電訊超星同電訊特首，電訊至尊前晚跑包尾，張敬石都話表現幾好，係得隻特首唔掂，新特首真係好差咁喎。言者未必有心，聽者唔知有冇意呢？不過張敬石應該真係講緊隻馬，係啩。