梁營政府出事，其實早在意料之中，一班冇乜實際政治歷練烏合之眾，點可以糅合成管治團隊，完全反智，失敗係必然。
名都未聽過 即做局長
政黨政治功能在於訓練專業政治人才及建立核心管治理念，年輕學生吸納入青年黨部，參與政策研究、組織動員工作，不斷進行政治辯論，在黨內競爭上位。英國保守黨卡梅倫是黨內少壯派時，已經與一班同年紀黨友一齊奮鬥，而黨內大老為奪回失落了十年的政權，也會支持少壯派，盡量給他們歷練及表現機會。工黨九十年代出了貝理雅、白高敦，改革老工黨，迎接新經濟，實現了最長執政。工黨若要在下次大選打敗保守黨，只有再培育出比保守黨金馬倫一代更sharp醒的政治人才，政治水平就是這樣在政黨競爭下提升，配合世界大勢而進步。
港人治港失敗是空有一套基本法行政主導體制，但內裏運行操作卻不知所謂，一如電腦硬件配備了，但操作系統充滿bug，行得一陣就停機要reboot。首先特首禁止由政黨出任，全無政治合理性可言，就如老董、振英，所謂從政經驗得啖笑，連一次地區選舉經驗都欠奉，有的只係北京上層政治出謀獻策擦鞋功夫。今日傳媒高度發達，又豈是呢款業餘政客所能應付。如果在民主體制下，梁振英呢類政客好難選得上，在去年特首選舉兩場電視辯論中，表現平平無奇，何俊仁高佢幾班。
其次就係一群來自不同勢力之業餘政客，點可能成為執政團隊呢？吳克儉、黃錦星，名都未聽過就做局長，又係反智，陳茂波只係做咗一屆議員，又唔係直選出身，憑甚麼可以成為執政團隊超級局長，未計高靜芝呢類花瓶梁粉，又憑甚麼可過問各級公職人事任命。
一班業餘政客走埋一齊，充滿熱誠，聲稱要解決香港深層次矛盾、土地供應、中港矛盾，信佢嗰個都儍。好簡單一件南丫島海難調查事件，政治判斷差劣，一直唔肯郁廖漢波，又俾律政司老點，因怕對日後被索償不利，死唔肯公開道歉，份報告書鬧到政府仆街，梁振英、張炳良點解會認為唔道歉，畀海事處自己查自己就可以過到骨？我諗一個普通丙級政務官政治判斷力都比佢兩位高。
上任以來不斷犯低級錯誤，責任係咪在行會？非也，一班雜牌軍司局長揸架紙紮坦克車，唔使打大風黑雨，無端端都會甩轆啦，唔夠班之行會，只不過陪襯而已。港人治港失敗，就是業餘政客治港之失敗。
添馬男